អ្នកនាងភិន សុដាលីស បានលេចមុខក្នុងតំណែងតួឯកសារជាថ្មី តាមរយៈរឿង ”ព្រលឹង” ដែលចាប់ដៃគូជាមួយនាយគ្រឿន និងលោកភឹម តារាវិបុល រួមទាំងតារាល្បីៗជាច្រើនដួងទៀត ក្នុងនោះ ក៏មានលោកហេង នរៈកក្កដា , មុន្នី ឌីយ៉ាម៉ង់ និងលោកមូល សារ៉ាវ៉ាន់ ជាដើម។
តាមរយៈការបញ្ចេញ Trailer នោះគេឃើញមានការចាប់អារម្មណ៍ច្រើន ហើយក្រុមការងារផលិតកម្មមហាហង្សថែមទាំងមានជំនឿចិត្តថា ភាពយន្ដមួយនេះមិនចាញ់រឿង ”ផ្ទះចុងភូមិ” ដែលទើបចាក់បញ្ចាំងកាលពីពេលថ្មីៗនេះឡើយ។
អ្នកតំណាងផលិតកម្មផលិតកម្មមហាហង្ស មិនបញ្ជាក់ពីទិន្នន័យប្រាក់ផលិតរឿង ”ព្រលឹង” ទេ គ្រាន់តែថាអស់ច្រើន ព្រោះទាំងបច្ចេកទេស និងទីតាំងថត គឺមានការសម្រិតសម្រាំងខ្លាំងណាស់។ ភាពយន្ដនេះគ្រោងនឹងដាក់លក់សំបុត្រនៅថ្ងៃទី៤ ខែកក្កដា ខាងមុខនេះ ហើយខណៈដែលថ្នាក់ដឹកនាំមហាហង្ស រំពឹងថា អាចកើបលុយមិនចាញ់រឿង ”ផ្ទះចុងភូមិ” ឡើយ។
តាមរយៈការលេចមុខរបស់ភិនសុដាលីស ដោយប៉ះជាមួយតារាកំប្លែងនាយគ្រឿន នេះ ទស្សនិកជននឹងបានប្លែកអារម្មណ៍ជាងភាពយន្ដមុនៗជាមិនខាន ព្រោះដាលីស ក៏ចូលចិត្តលេងក្រមិចក្រមើមដែរ ហេតុនេះហើយ អ្នកទាំងពីរប្រាកដជាមានការស៊ីចង្វាក់គ្នាជាមិនខាន។
អ្វីដែលគួរឲ្យចាប់អារម្មណ៍ថែមទៀតនោះ ពេលនេះ ដាលីស ក៏បានសម្រកទម្ងន់មករាងស្វែលជាងមុនដែរ ទើបធ្វើឲ្យនាងនៅតែស្ថិតក្នុងតំណែងតួឯក៕
