ភ្នំពេញ ៖ ប្តីប្រពន្ធមួយគូ ត្រូវបានក្រុមគ្រួសារអះអាងថា បាននាំទៅដកលុយពីធនាគារមួយ ដែលទើបគេវេរឲ្យ ហើយក៏បានបាត់ដំណឹងតាំងពីថ្ងៃនោះមក ពោលមកដល់ថ្ងៃនេះ មានរតៈពេល៨ថ្ងៃហើយ នៅមិនទាន់ឃើញពួកគេនាំគ្នាត្រឡប់មកផ្ទះវិញនៅឡើយទេ។
បើតាមក្រុមគ្រួសារប្តីប្រពន្ធ១គូនេះ បានប្រាប់ថា បុរសជាប្តី មានឈ្មោះ ហ៊ិន ភានិត ភេទប្រុស អាយុ២៥ឆ្នាំ ប្រឡងជាប់ក្របខណ្ឌមន្ត្រីនគរបាលជាតិ អង្គភាពនាយកដ្ឋានសរុបផែនការ និងស្ត្រីជាប្រពន្ធ មានឈ្មោះឈ្មោះ លី ចន្ធូ អាយុ២៧ឆ្នាំ បច្ចុប្បន្ន អ្នកទាំងពីរមានទីលំនៅផ្ទះលេខ១១៧E3Z ផ្លូវលេខ១៣៦ ភូមិ២ សង្កាត់ផ្សារកណ្តាលទី២ ខណ្ឌដូនពេញ។
ប្រភពដដែលនេះ បានរៀបរាប់ប្រាប់សមត្ថកិច្ចថា មុនពេលកើតហេតុ កាលពីវេលាម៉ោង៨និង០០នាទីព្រឹក ថ្ងៃទី០៣ ខែមិថុនា ឆ្នាំ២០១៩ ប្តីប្រពន្ធខាងលើនេះបាននាំគ្នាដកលុយនៅធនាគារ ABA សាខាទួលគោក ជាលុយដែលទើបលក់ដី ហើយអ្នកទិញដីនោះ បានវេរលុយចូលក្នុងគណនីរបស់ពួកគេ។
ប្រភពបានបន្តថា តាំងពីទៅដកលុយនោះមក ក្រុមគ្រួសារបានទាក់ទងប្តីប្រពន្ធមួយគូនេះបានធម្មតា លុះរហូតមកដល់ម៉ោង២រសផល ថ្ងៃខែដដែលនោះ ស្រាប់តែលែងទាក់ទងបាន ហើយបាត់ខ្លួនមិនឃើញត្រឡប់មកផ្ទះវិញ មកដល់ថ្ងៃនេះមានរយៈពេល៨ថ្ងៃហើត ធ្វើឲ្យក្រុមគ្រួសារភ័យឆោឡោ និងបានរាយការណ៍ប្រាប់សមត្ថកិច្ច។
ក្រោយទទួលពាក្យបណ្តឹង កម្លាំងសមត្ថកិច្ចកំពុងធ្វើការស្រាវជ្រាវ ដើម្បីស្វែងរកប្តីប្រពន្ធ១គូនេះ ៕
