ភ្នំពេញ ៖ ក្រោយពីបានបិទបញ្ចប់ការរុករកមនុស្សដែលជាប់ក្នុងគំនរអគារ៧ជាន់នោះ សម្តេចហ៊ុន សែន នាយករដ្ឋមមន្ត្រីនៃព្រះរាជាណាចក្រកម្ពុជា បានថ្លែងប្រាប់អ្នកសារព័ត៌មានពីមូលហេតុដែលសម្តេចបានដកលោកញឹម វណ្ណដា មានតួនាទីជាទេសរដ្ឋមន្ត្រី និងជាអនុប្រធានទី១ នៃគណៈកម្មាធិការជាតិគ្រប់គ្រងគ្រោះមហន្ដរាយ។
សម្តេចតេជោ ហ៊ុន សែន បានថ្លែងចំពោះមុខអ្នកសារព័ត៌មាន និងក្រុមអ្នកសង្គ្រោះជាច្រើននាក់ថា “នេះជាលើកដំបូង ដែលខ្ញុំបណ្ដេញសមាជិករាជរដ្ឋាភិបាលចេញ គឺទេសរដ្ឋមន្ត្រីទទួលបន្ទុកបេសកកម្មពិសេស និងជាអនុប្រធានទី១ គណៈកម្មការជាតិគ្រប់គ្រងគ្រោះមហន្តរាយ ហើយខ្ញុំជាប្រធាន ខ្ញុំមិនបានចុះមកទីនេះ”។
សម្តេចបានបន្តប្រសាសន៍ថា “ពីទីក្រុងបាងកក ខ្ញុំមិនបានទទួលបានរបាយការណ៍ណាមួយពីគាត់នៅវេលាម៉ោងប្រមាណជិត១០យប់ ខ្ញុំបានវាយតាម Wath’s app សួរថា ឯកឧត្តម (ញឹម វណ្ណដា)នៅឯណា? តែមិនបានឆ្លើយតមបមកសោះ ខ្ញុំបានសួរមកឯកឧត្តម យន្ត មីន ថា បានឃើញឯកឧត្តម ញឹម វណ្ណដា ទេ ហើយខ្ញុំបានសួរទៅឯកឧត្តមសាយ សំអាល់ ក៏មិនបានឃើញគាត់ដែរ។ ខ្ញុំបានហៅទូរស័ព្ទទៅគាត់ តែគាត់មិនបានលើកទូរស័ព្ទទេ។ ខ្ញុំបានប្រាប់ទៅឧបនាយករដ្ឋមន្ត្រីប្រចាំការ ប៊ិន ឈិន ឲ្យតាមរកឯកឧត្តម ញឹម វណ្ណដា តើនៅឯណាពេលនេះ ? ព្រោះនេះជាបញ្ជាប្រតិបត្តិការកម្លាំងសរុប រាប់ទាំងកងកម្លាំងប្រដាប់អាវុធ”។
សម្តេចបានបន្តប្រសាសន៍ទៀតថា “នៅម៉ោងប្រមាណ ២ ទើបឯកឧត្តម ប៊ិន ឈិន រកឃើញគាត់ ហើយឲ្យគាត់មកទីនេះ ។ នៅម៉ោងប្រមាណ៥ភ្លឺ នៅទីក្រុងបាងកក ខ្ញុំបានទទួលរបាយការណ៍ដ៏វែង។ មិនចាំបាច់រាយការណ៍អញ្ចឹងទេ។ បានខ្ញុំឆ្លើយថា មិនបាច់រាយការណ៍អញ្ចឹងទេ។ ម្សិលមិញ ពេលខ្ញុំមកដល់ទីនេះ ខ្ញុំបានសួរទៅឯកឧត្តមថា ឯកឧត្តមនៅទីណាឲ្យពិតប្រាកដ ហើយគាត់ឆ្លើយថាគាត់នៅទីហ្នឹង។ អញ្ចឹងខ្ញុំនិយាយការពិត មិនទទួលខុសត្រូវ និងការភូតកុហក។ ខ្ញុំមិនអាចទុកឲ្យមន្ត្រីណាមួយនៅក្នុងព្រះរាជាណាចក្រកម្ពុជា ភូតកុហករបៀបនេះតទៅទៀតទេ។ ខ្ញុំសូមថ្កោលទោសយ៉ាងម៉ឺងម៉ាត់ ។ ពិតមែនហើយ ខ្ញុំបានយោគយល់ហើយពេលនេះ គ្រាន់តែដកចេញពីសមាជិកគណៈរដ្ឋមន្ត្រី នឹងទុកឲ្យធ្វើជាទីប្រឹក្សារាជរដ្ឋាភិបាល ហើយបើមិនពេញចិត្ត ខ្ញុំក៏ដកចេញបន្តទៀត។ ខ្ញុំសោកស្ដាយ ប្រសិនបើមានប្រតិបត្តិការពេញទំហឹង យើងអាចរកបាន លើការជាក់ស្ដែង ។ ខ្ញុំមកដល់ទីនេះ ក៏មានប្រយោជន៍មួយចំនួន ទោះបីខ្ញុំមិនបានចូលរួមប្រឡូកដោយផ្ទាល់ ក៏មានប្រយោជន៍មួយចំនួន ក្នុងការផ្ដល់មតិ ទាំងការយកសម្ភារៈកន្លែងនេះកន្លែងនោះ នឹងទៅកន្លែងកងវិស្វកម្ម និងបច្ចេកទេសពីកន្លែងផ្សេងមកជួយអន្តរាគមន៍ដោះស្រាយ ប៉ុន្តែជាអកុសលប្រតិបត្តិការនេះ ត្រូវបានបណ្ដែតបណ្ដោយ។ ខ្ញុំមិននឹកស្មាន បទពិសោធន៍មួយនេះ បើទោះបីជាមានត្រឹមតែគ្នាពីរបីនាក់ ក៏ត្រូវមានអ្នកទទួលខុសត្រូវដែរ ចុះទៅដល់ទីកន្លែង ដើម្បីដោះស្រាយបញ្ហានៅនឹងកន្លែង។ ហើយ ញឹម វណ្ណដា ពូកែណាស់ ក្នុងការនិយាយប្រើវិធានការសរុប កម្លាំងសរុប ប៉ុន្តែដល់ពេលមានការ ដេកនៅឯខេត្តកំពត ជាមួយស្រីណាមិនដឹងទេ ខ្ញុំមិនយល់ទេ។ ប្រពន្ធឬក៏ស្រី ខ្ញុំមិនយល់ខ្ញុំមិនដឹង នៅក្នុងខេត្តកំពត ក្នុងពេលនៅទីនេះ មានមានព្រឹត្តិការណ៍ដ៏អកុសល នៅខេត្តព្រះសីហនុ”។
គួរបបញ្ជាក់ថា កាលពីរសៀលម្សិលមិញ ថ្ងៃទី២៤ ខែមិថុនា ឆ្នាំ២០១៩ សម្តេចនាយករដ្ឋមន្ត្រីហ៊ុន សែន បានដកតំណែងលោកញឹម វណ្ណដា ជាទេសរដ្ឋមន្ត្រី និងជាអនុប្រធានទី១ នៃគណៈកម្មាធិការជាតិគ្រប់គ្រងគ្រោះមហន្ដរាយ មកត្រឹមជាទីប្រឹក្សារដ្ឋាភិបាល ដែលមានព្រះរាជក្រឹត្យ ឡាយព្រហស្ថដោយព្រះករុណា ព្រះបាទនរោត្តម សីហមនី ព្រះមហាក្សត្រនៃព្រះរាជាណាចក្រកម្ពុជា៕
