ខេត្តសៀមរាប ៖ ក្មេងស្រីតូចម្នាក់ ហេតុតែមានចិត្តស្រលាញ់ការសិក្សារៀនសូត្រ ទោះបីជាជីវភាពគ្រួសារ ក្រី ក្រតោកយ៉ាក គ្មានមធ្យោបាយធ្វើដំណើរទៅសាលារៀន ព្រោះផ្ទះនៅលើផ្ទៃបឹងទន្លេសាប (ផ្ទះបណ្តែតទឹក) គ្មានទូកជិះនឹងគេ ក៏បានយកស្នោនិងសំរាម បណ្តែតទឹក ចងជាមួយសំណាញ់មង ដាក់ក្តារឈើពីលើ សម្រាប់អុំ ធ្វើជាមធ្យោបាយទៅសាលារៀន ឆ្លងទឹកចម្ងាយប្រមាណជាង ១ពាន់ម៉ែត្រ។
ក្មេងស្រីអភ័ព្វនេះ រស់នៅក្នុងគ្រួសារទីទ័លក្រមួយ ដែលមានផ្ទះបណ្តែតទឹក លើផ្ទៃបឹងទន្លេសាប ស្ថិតក្នុងភូមិ សាស្ត្រខេត្តសៀមរាប។
ក្មេងស្រីខាងលើ បានយកស្នោ និងសំរាមអណ្តែតទឹក ចងជាមួយសំណាញ់មង ដាក់ក្តារ សន្លឹកពីលើ សម្រាប់ ធ្វើជាមធ្យោបាយទៅសាលារៀន ឆ្លងទឹកទន្លេ ជាង១០០០ម៉ែត្រ ដែលបង្ហាញពីការតស៊ូរបស់នាង ដើម្បីសម្រេច គោលបំណងបានរៀនសូត្រនឹងគេ ទោះត្រូវឆ្លងទឹកទន្លេរាប់ពាន់ម៉ែត្រ ក៏មិនរួញរា ប្រឹងដោយខ្លួនឯង ជាមួយ នឹងហានិភ័យខ្ពស់បំផុត។
ក្មេងស្រីតូចនេះ បានបង្ហាញនូវអារម្មណ៍ក្តុកក្តួល នៅពេលមានអ្នកដំណើរព្យាយាមជួយយកអាសា ឱ្យនាងឡើង ទូក កណ្តាលទន្លេ ដើម្បីជិះទៅកាន់សាលារៀន។ លុះពេលសួរនាំថា ហេតុអ្វីក្មួយមិនជិះទូកជាមួយគេ? កុមារីរូបនេះ បានស្រក់ទឹកភ្នែក និយាយទាំងអួលដើមកថា “គេមិនឱ្យខ្ញុំជិះជាមួយទេ ប៉ុន្តែដើម្បីបានចូលរៀន ខ្ញុំត្រូវការប្រើមធ្យោបាយបែបនេះ”។
បន្ទាប់ពីបានឃើញនូវរូបភាពដ៏គួរឱ្យអាណិតអាសូរបែបនេះ អ្នកប្រើប្រាស់បណ្តាញសង្គម បានបញ្ចេញនូវ មិតយោបល់ផ្សេងៗគ្នា តែក្នុងន័យគោរពនិងផ្តល់តម្លៃដល់ការតស៊ូរបស់ក្មេងស្រីតូចរូបនេះ ដោយខ្លះបានលើក ឡើងថា “ចំណុចនេះចង់បញ្ជាក់ថា អ្នកធ្លាប់ជួបសេចក្តីអត់ លំបាក ក្រខ្សត់ ទើបដឹងថាជីវិតមួយនេះ ត្រូវឆ្លងកាត់ បែបណា ដើម្បីឱ្យមានអនាគត? យើងមិនត្រូវនិយាយថា ជីវិតរស់នៅ ម្តេចមានការបែងចែកខុសគ្នាឆ្ងាយម៉្លេះ? តាមពិត នេះជាស្ថានភាពជីវភាព ការរស់នៅរបស់មនុស្សម្នាក់ៗ រមែងតែងតែជួបនូវឧបសគ្គខ្លះ ប៉ុន្តែយើងត្រូវ ទទួលយក រួចបង្រៀនខ្លួនឯង ឱ្យមានការប្រឹងប្រែង តស៊ូ អត់ធ្មត់ ដើម្បីសម្រេចទៅដល់គោលដៅមួយមាន អនាគតល្អភ្លឺស្វាង”៕