ខេត្តឧត្តរមានជ័យ ៖ បុរសម្នាក់ បានដុតគល់ឈើ ក្នុងដីស្រែរបស់ខ្លួន ស្រាប់តែក្រោយមក ភ្លើងបានឆេះរាលដាលដល់ស្រែស្រូវប្រជាពលរដ្ឋ បណ្តាលឱ្យខូចខាងអស់ប្រមាណ១០ហិកតារ។
ករណីអគ្គិភ័យនេះ បានកើតឡើងកាលពីវេលាម៉ោង១២និង៣០នាទីថ្ងៃត្រង់ ថ្ងៃទី២៧ ខែវិច្ឆិកា ឆ្នាំ២០២៥ ស្ថិតក្នុងភូមិឈើស្លាប់ ឃុំគោកខ្ពស់ ស្រុកបន្ទាយអម្ពិល។
តាមប្រភពប្រជាពលរដ្ឋរងគ្រោះ បានឱ្យដឹងថា ស្រូវដែលរងការឆាបឆេះ ជារបស់ប្រជាពលរដ្ឋ ចំនួន៥គ្រួសារ ស្មើផ្ទៃដី ចំនួន១១ហិកតារ ស្ថិតនៅចំណុច ត្រពាំងព្រីងតាណែម ខាងកើតអូរកប់សេះ ប្រហែល២គីឡូម៉ែត្រ ក្នុងភូមិខាងលើ។
ប្រភពដដែល បន្តថា ក្នុងចំណោមផ្ទៃដីស្រែរបស់ពលរដ្ឋ ចំនួន១១ហិកតារនោះ មានដីស្រែខ្លះបានច្រូតកាត់ រួចរាល់មួយចំនួនហើយ តែមិនទាន់ដឹកជញ្ជូនយកទៅទុកដាក់ និងស្រែខ្លះទៀត មិនទាន់បានច្រូតកាត់នៅ ឡើយទេ។
ដោយឡែក តាមប្រភពអាជ្ញាធរ បានឱ្យដឹងថា មុនពេលកើតហេតុ មានប្រជាពលរដ្ឋម្នាក់ឈ្មោះជុង រិទ្ធ ភេទប្រុស អាយុ៤៥ឆ្នាំ បានដុតគល់ឈើ ក្នុងដីស្រែរបស់ខ្លួន បន្ទាប់មកបានពន្លត់រួចហើយដែរ តែវានៅសេសសល់រងើកខ្លះ មិនទាន់រលត់អស់ ស្រាប់តែភ្លើងបានឆេះរាលដាលឡើងវិញ បង្កជាការឆាបឆេះរាលដល់ស្រូវប្រជា ពលរដ្ឋផ្សេងទៀតបែបនេះតែម្តង។
បន្ទាប់ពីកើតមានហេតុការណ៍ខាងលើ អ្នកភូមិប្រមាណជិត៥០នាក់ បាននាំគ្នាចូលរួមជួយពន្លត់ភ្លើង តែដោយ សារតែភ្លើងឆាបឆេះលឿនពេក ទើបធ្វើឱ្យស្រូវក្នុងស្រែ ត្រូវភ្លើងឆេះខ្ទេចអស់ មិនអាចជួយសង្គ្រោះបានឡើយ៕
