កីឡាករ និងបុគ្គលិករបស់ក្លឹប Leicester បានធ្វើដំណើរមកដល់ទីក្រុងបាងកក កាលពីថ្ងៃអាទិត្យ ដើម្បីចូលរួមគោរពវិញ្ញាណក្ខន្ធម្ចាស់ក្លឹប លោក Vichai Srivaddhanaprabha ដែលទទួលមរណភាពនៅក្នុងឧបត្តិហេតុធ្លាក់ឧទ្ធម្ភាគចក្រ កាលពីសប្តាហ៍មុន។
លោក Vichai Srivaddhanaprabha វ័យ៦០ឆ្នាំ រួមនឹងសហសេវិក៤នាក់ផ្សេងទៀត នៅពេលឧទ្ធម្ភាគចក្ររបស់លោកធ្លាក់ផ្ទុះជាអណ្តាតភ្លើង បន្ទាប់ពីហោះឡើងពីពហុកីឡដ្ឋានបានបន្តិច។
ថ្ងៃអាទិត្យ គឺជាថ្ងៃទី២ នៃពិធីបុណ្យសពរបស់លោក Vichai Srivaddhanaprabha ដែលរៀបចំរយៈពេលមួយសប្តាហ៍ នៅក្នុងវត្ត Thepsirin ដែលជាវត្តដ៏ល្បីមួយសម្រាប់ទទួលធ្វើពិធីបុណ្យមនុស្សសំខាន់ៗ។
តាមប្រភពព័ត៌មានពីក្រុមហ៊ុន King Power របស់លោក Vichai Srivaddhanaprabha បានឱ្យដឹងថា សមាជិក១៣នាក់របស់ Leicester ដោយរួមបញ្ចូលទាំងលោក Claude Puel អ្នកចាត់ការទូទៅ លោក Jon Rudkin នាយកគ្រប់គ្រងក្លឹប ខ្សែប្រយុទ្ធ Jamie Vardy និង Shinji Okazaki បានមកដល់ទីក្រុងបាងកក កាលពីល្ងាចថ្ងៃអាទិត្យ វេលាម៉ោង៦។
ក្លឹប Leicester បានសម្តែងការសោកស្តាយយ៉ាងខ្លាំងចំពោះការបាត់បង់ជីវិតរបស់លោក Vichai Srivaddhanaprabha ដែលជាម្ចាស់ភាគហ៊ុនដ៏ធំរបស់ក្លឹប Leicester។ ក្នុងអាណត្តិគ្រប់គ្រងរបស់លោកបានជួយឱ្យក្លឹបនេះ ឈ្នះជើងឯកបាល់ទាត់ English Premier League ជាលើកដំបូង ក្នុងរដូវកាល២០១៥-២០១៦៕