តាមប្រភពព័តមាន BBC ចេញផ្សាយកាលពីពេលថ្មីៗនេះ បានឱ្យដឹងថា កីឡាករខ្សែប្រយុទ្ធ Sterling បានយល់ព្រមបន្តកុងត្រាថ្មី រយៈពេល៥ឆ្នាំ ជាមួយក្លឹប Man City។
ជាការពិត កីឡាករវ័យ២៣ឆ្នាំរូបនេះ នៅសល់កុងត្រាចាស់ជាមួយ Man City ១៨ខែទៀត តែក្លឹបនេះបារម្ភខ្លាចបាត់បង់។ ម៉្យាងវិញទៀត គោលការណ៍របស់ក្លឹប គឺត្រូវបន្តកុងត្រាថ្មីដល់កីឡាករឆ្នើមឱ្យបានមួយឆ្នាំ មុនផុតកុងត្រា។
ក្រោយទទូលបានកុងត្រាថ្មី Sterling បាននិយាយថា “ខ្ញុំសប្បាយចិត្តខ្លាំងណាស់ ដែលបានបន្តរួមរស់ជាមួយក្លឹប Man City។ ខ្ញុំនឹងប្រឹងប្រែងជួយក្លឹបបន្តទៀតសម្រាប់រដូវក្រោយៗទៀត”។
កុងត្រាថ្មីនឹងចងជើងកីឡាកររូបនេះ រហូតដល់ឆ្នាំ២០២៣។ ជាមួយនឹងកុងត្រាថ្មីនេះ កីឡាករ Sterling នឹងទទួលបានប្រាក់ឈ្នួលកើនឡើងដល់៣០ម៉ឺនផោន ស្មើនឹងជាង៣៨ម៉ឺនដុល្លារ ក្នុង១សប្តាហ៍។
Sterling បានចូលមកលេងឱ្យ Man City តាំងពីឆ្នាំ២០១៥ ក្រោយផ្ទេរមកពីក្លឹបហង្សក្រហម Liverpool ក្នុងតម្លៃខ្លួនជាង៦០លានដុល្លារ។
នៅជាមួយក្លឹបនេះ ធ្លាប់ស៊ុតបាល់បាន៣៧គ្រាប់ ក្នុងការបង្ហាញវត្តមាន១០៦ប្រកួត៕