ក្រោយពីបាត់មុខពីសិល្បៈមួយរយៈធំ ស្រាប់តែពេលនេះ កែវ ពេជ្រពិសី មានទម្តង់មុខប្លែក មើលសឹងមិនស្គាល់ ទើបធ្វើឱ្យលេចឮថា នាងបានវះកាត់កែមុខ ដើម្បីផ្គាប់ចិត្តគូស្នេហ៍ថ្មី។
កែវ ពេជ្រពិសី បានច្រានចោលដំណឹងនេះ និងអះអាងថា នាងគ្រាន់តែឡើងគីឡូជាងមុនប៉ុណ្ណោះ មិនបានកែមុខ តចង្កាទេ ហើយក៏គ្មានគម្រោងចូលរោងការឆាប់ៗដែរ…។
ខាងក្រោមនេះ ជាបទសម្ភាសន៍របស់អ្នកយកព័ត៌មាន “អង្គរធំ” ជាមួយកែវ ពេជ្រពិសី កាលពី ថ្ងៃទី២៩ ខែឧសភា ៖
អង្គរធំ ៖ មានព័ត៌មានថា ពេជ្រពិសី បានកែមុខ តចង្កា ទើបបានជាពេលនេះ ប្លែកខ្លាំង រហូតដល់មើលមិនចង់ស្គាល់ តើពិសី ខ្លួនឯងគិតថា ផ្ទៃមុខនាងខុសពីមុនច្រើនទេ?
ពេជ្រពិសី ៖ ប្លែកមែនបង! ខ្ញុំក៏ដឹងថា ខ្ញុំមានមុខប្លែកជាងមុនដែរ។ ប៉ុន្តែនិយាយដោយត្រង់ ខ្ញុំអត់បានកែកុនផ្ទៃមុខអីទេ។ រឿងតចង្កាហ្នឹង ក៏ខ្ញុំមិនបានធ្វើដែរបង គឺមូលហេតុដែលខ្ញុំប្លែកជាងមុនហ្នឹង ដោយសារតែខ្ញុំឡើងគីឡូបន្តិច អ៊ីចឹងមើលទៅប្លែក ហើយ។ ពីមុនខ្ញុំស្គម មើលទៅរាងស្វែល ឥឡូវឡើងគីឡូអ៊ីចឹង មើលទៅធាត់បន្តិច តែឡើងហ្នឹង មិនទាន់ដល់ពេលប្រកាសអាសន្នទេ គឺគ្រាន់តែអ្នកខ្លះ មើលមិនស្គាល់ហ្នឹង។
អង្គរធំ ៖ ម៉េចបានពេជ្រពិសី ឡើងគីឡូសោះ តែបែរជាមុខមាត់ប្លែកអស់រលីងអ៊ីចឹង? មានគម្រោងសម្រកទម្ងន់ជាបន្ទាន់វិញទេ?
ពេជ្រពិសី ៖ ប្រាកដជាចង់ស្រកដូចគីឡូដើមណាស់បង។ ប៉ុន្តែខ្ញុំអត់ហ៊ានលេបថ្នាំសម្រកទេ ព្រោះខ្លាចប៉ះពាល់ដល់សុខភាព ម៉្យាងទៀតដោយសារតែរវល់ពេក គ្មានពេលហាត់ប្រាណដូចគេ ទើបឥឡូវបានជារាងអ៊ីចឹងអស់ទៅ។ រឿងកែមុខមាត់ហ្នឹង ខ្ញុំពិតជាអត់បានធ្វើមែន៕