លោកហាស សំអាត ដែលជាម្ចាស់បទ ”សុំទោសកំពង់ចាម” មានតួនាទីសំខាន់នៅផលិតកម្ម Bee Production នោះ នឹងរៀបចំការប្រគំតន្រ្ដីធំរយៈពេល៥ថ្ងៃជាប់គ្នា ចាប់ពីថ្ងៃទី៩ដល់១៣ ខែមករា ឆ្នាំ២០២០ នៅខាងលិចផ្សារព្រៃទា ខាងលិចវិហារចិន។
នេះជាការបញ្ចេញនូវកម្លាំងរបស់ផលិតកម្ម Bee Production ខណៈដែលតារាចម្រៀងរបស់ផលិតកម្មនេះនឹងបង្ហាញខ្លួនស្ទើរតែទាំងអស់នៅលើឆាកតន្រ្ដីពិសេសនោះ។
លោកហាស សំអាត ជាអ្នកដឹកនាំរៀបចំការប្រគំតន្រ្ដីនោះ បានឲ្យដឹងថា ដោយសារតែលោកមានបទពិសោធន៍ទៅលើប្រគំតន្រ្ដីយូរមកហើយនោះ ទើបពេលនេះនៅពេលដែលលោកមានតួនាទីនៅផលិតកម្ម Bee Production លោកក៏រៀបចំការប្រគំតន្រ្ដីនេះឡើង ដែលនេះជាយុទ្ធសាសាស្រ្ដរបស់ផលិតកម្មលោក ក៏ដូចជាជួយពង្រីកទីផ្សារតារាចម្រៀងផលិតកម្មរបស់លោក ឲ្យមានសកម្មភាពតាមរយៈការបង្ហាញបទថ្មីៗរបស់ពួកគេនៅចំពោះមុខមហាជនផងដែរ។
ប៉ុន្ដែនេះមិនមែនជាលើកទី១នោះទេ ព្រោះកន្លងមកលោកធ្លាប់រៀបចំការប្រគំតន្រ្ដី និងឲ្យតារារបស់ Bee Production ច្រៀងតាមឆាក Concert និងឡើងឆាកទូរទស្សន៍ជាច្រើនលើកច្រើនសារមកហើយ។
ប៉ុន្តែការរៀបចំលើកនេះមានទ្រង់ទ្រាយធំជាងលើកមុនៗ ហើយធ្វើនៅទីប្រជុំជនជាយក្រុង ហេតុនេះហើយលោករំពឹងថា នឹងមានមនុស្សជាច្រើនចូលរួមទស្សនាជាមិនខាន។
លោកសំអាត ដែលធ្លាប់ជាតារាចម្រៀងនៅប្រទេសកូរ៉េ ហើយពលករជាច្រើនបានស្គាល់រូបលោកនោះថា សម្រាប់តារាចម្រៀង Bee Production ទាំងអស់បានត្រៀមខ្លួនរួចរាល់អស់ហើយនូវការច្រៀងសម្ដែងបទថ្មីៗលើឆាកតន្រ្ដីនៅផ្សារព្រៃទា រយៈពេល៥ថ្ងៃជាប់គ្នានេះ៕
