យោធាមីយ៉ាន់ម៉ា ដែលកំពុងជួបការលំបាកក្នុងការជ្រើសរើសទាហានថ្មីសម្រាប់ទប់ទល់ជាមួយកងកម្លាំងតស៊ូស្របពេលមានអ្នកស្លាប់ និងការផ្តាច់ខ្លួនយ៉ាងខ្លាំង បានសម្រេចចិត្តជ្រើសរើសស្ត្រីសម្រាប់តួនាទីប្រយុទ្ធបន្ថែមទៀត។នេះបើយោងតាមការចេញផ្សាយរបស់សារព័ត៌មានThe Irrawaddy កាលពីថ្ងៃចន្ទទី១២ខែសីហាឆ្នាំ២០២២។
ដំណឹងជ្រើសរើសទាហានស្រីនៅក្នុងកាសែត Myawadyដែលគ្រប់គ្រងដោយរបបយោធាកាលពីថ្ងៃចន្ទបាន អញ្ជើញស្ត្រីនៅលីវមាន អាយុពី១៨ទៅ២៥ឆ្នាំឱ្យចូលរួមក្នុងកងកម្លាំងប្រដាប់អាវុធរដ្ឋាភិបាល។
បេក្ខជននឹងទទួលបានការហ្វឹកហ្វឺនរយៈពេលបួនខែ ហើយបន្ទាប់មកក្លាយជា អ្នកគាំទ្រការប្រយុទ្ធក្នុងជួរកងទ័ពជើងគោក ជើងទឹក និងទ័ពអាកាស។របបយោធាបាននិយាយថា បេក្ខជនមិនត្រូវការសញ្ញាបត្រ ឬទម្ងន់ស្រាលជាង ៤៥គីឡូក្រាម ដែលជាតម្រូវការពីមុននោះទេ។
ទាហានស្រីត្រូវបានគេប្រទះឃើញនៅជួរមុខនៅក្នុងតំបន់ជាច្រើន រួមទាំងរដ្ឋ Kayah ជាកន្លែងដែលស្ត្រីត្រូវបានចាប់ខ្លួន និងប្រើប្រាស់ជាខែលមនុស្សសម្រាប់ការពារ។
របបនេះកំពុងជួបការលំបាកក្នុងការជ្រើសរើសទាហានហើយពាក្យសុំចូលរៀននៅសាលាយោធាក៏មានការធ្លាក់ចុះ
ចាប់តាំងពីរដ្ឋប្រហារឆ្នាំ ២០២១។
យោងតាមរដ្ឋាភិបាលរួបរួមជាតិស៊ីវិល (NUG)បានអោយដឹងថា ទាហានរបបយោធាជាង ២០១៥០នាក់ត្រូវបានសម្លាប់ និង ៧០០០នាក់ផ្សេងទៀតបានរងរបួសចាប់តាំងពីការប្រកាសសង្គ្រាមរបស់ NUG កាលពីថ្ងៃទី ៧ខែកញ្ញា ឆ្នាំ ២០២១ហើយ កងទ័ពរបបជាច្រើនក៏កំពុងរត់ចោលជួរផងដែរ។បុគ្គលិកកងកម្លាំងប្រដាប់អាវុធរបស់រដ្ឋាភិបាលត្រូវបានគេប៉ាន់ប្រមាណថាមានចន្លោះពី ៣០ទៅ ៣៥ម៉ឺននាក់នៅដើមឆ្នាំ២០២១ជាមួយនឹងការប៉ាន់ស្មានបច្ចុប្បន្ននៅសល់ប្រហែល២០ម៉ឺនហើហើយក្នុងនោះមានតែប្រហែល១០ម៉ឺននាក់ប៉ុណ្ណោះជាទាហានប្រយុទ្ធ៕