វិមានក្រឹមឡាំងបានបញ្ជាក់ឡើងវិញនូវគោលជំហររបស់ខ្លួនថារុស្ស៊ីបើកចំហចំពោះការចរចាដើម្បីបញ្ចប់សង្រ្គាមនៅក្នុងជម្លោះជាមួយអ៊ុយក្រែន ប៉ុន្តែបានរំលឹកឡើងវិញថា ការពិតនៃទឹកដីដែលរុស្ស៊ីទើបដាក់បញ្ចូលថ្មីមិនអាចត្រូវបានគេព្រងើយកន្តើយឡើយនោះទេ។
អ្នកនាំពាក្យវិមានក្រឹមឡាំង លោក Dmitry Peskov បានប្រាប់អ្នកយកព័ត៌មានថាប្រទេសរុស្ស៊ីនឹងមិនបោះបង់ការទាមទាររបស់ខ្លួនចំពោះតំបន់ទាំង៤របស់អ៊ុយក្រែន ដែលទីក្រុងម៉ូស្គូបានប្រកាសដាក់បញ្ចូលជាឧបសម្ព័ន្ធកាលពីឆ្នាំមុនបន្ទាប់ពីការបោះឆ្នោតប្រជាមតិដែលទីក្រុងគៀវនិងលោកខាងលិចបានរិះគន់ថាជាការក្លែងបន្លំ និងខុសច្បាប់។
លោក Dmitry Peskov បានថ្លែងថា រដ្ឋធម្មនុញ្ញសហព័ន្ធរុស្ស៊ីបានដាក់បញ្ចូលរួចហើយ ហើយយើងមិនអាចមិនអើពើបានទេ។លោក Peskov បាននិយាយកាលពីថ្ងៃអង្គារថាប្រទេសរុស្ស៊ីនឹងមិនអាចសម្របសម្រួលលើបញ្ហានេះបានទេ ទាំងនេះគឺជាការពិតដ៏សំខាន់។
ប្រទេសរុស្ស៊ីបានប្រកាសដាក់បញ្ចូលតំបន់ Donetsk, Luhansk, Kherson និង Zaporizhzhia ដែលមានផ្ទៃដីស្មើនឹង១៥%នៃផ្ទៃដីទាំងមូលរបស់អ៊ុយក្រែនកាលពីខែកញ្ញាឆ្នាំមុន។ លោក Peskov បាននិយាយថា រុស្ស៊ីបើកចំហចំពោះការចរចា ប្រសិនបើទីក្រុងគៀវប្រគល់តំបន់នោះ គ្មានតំបន់ណាមួយត្រូវបានគ្រប់គ្រងទាំងស្រុងដោយកងកម្លាំងរបស់ទីក្រុងម៉ូស្គូនោះទេ។
ហ្សេឡិនស្គី៖ស្ថានភាពប្រយុទ្ធនៅ Bakhmut កាន់តែតឹងតែង
ប្រធានាធិបតីអ៊ុយក្រែន លោក ហ្សេឡិនស្គីបាននិយាយថា ស្ថានភាពប្រយុទ្ធជួរមុខនៅទីក្រុង Bakhmut ភាគខាងកើត ប្រទេសកាន់តែមានភាពលំបាកនិងស្មុគស្មាញ។កងកម្លាំងរុស្ស៊ីបានព្យាយាមដណ្តើមយកទីក្រុងនេះអស់រយៈពេលជាងប្រាំមួយខែមកហើយ។
លោកហ្សេឡិនស្គីបាននិយាយថា ខ្មាំងសត្រូវកំពុងបំផ្លាញអ្វីៗគ្រប់យ៉ាងដែលអាចប្រើដើម្បីការពារទីតាំងរបស់យើង។លោកបាននិយាយនៅក្នុងវីដេអូប្រចាំថ្ងៃរបស់លោកថា ទាហានរបស់យើងដែលការពារទិសដៅ Bakhmut គឺជាវីរបុរសពិត។
ការប្រយុទ្ធគ្នាយ៉ាងខ្លាំងក្លាបំផុតដែលបានកើតឡើងចាប់តាំងពីរុស្ស៊ីបានឈ្លានពានអ៊ុយក្រែនកាលពីជាងមួយឆ្នាំមុន បានកើតឡើងនៅ Bakhmut ក្នុងតំបន់ Donetsk របស់អ៊ុយក្រែនដែលផ្នែកមួយស្ថិតនៅក្រោមការគ្រប់គ្រងរបស់រុស្ស៊ី និងសម្ព័ន្ធមិត្តផ្តាច់ខ្លួនរបស់រុស្ស៊ី៕