ខេត្តកំពង់ឆ្នាំង ៖ ព្រះសង្ឃវ័យចំណាស់មួយអង្គ ព្រះនាម ង៉ែត ង៉ាន់ ព្រះជន្ម៧០វស្សា ជាសង្ឃគង់នៅ វត្តក្រោលជី និងមានស្រុកកំណើតនៅឃុំត្រពាំងជង ស្រុកបាកាន ខេត្តពោធិ៍សាត់ បានបួសរាប់សិបឆ្នាំមកហើយ ប៉ុន្តែមិនអាចលះបង់កិលេសតណ្ហាបាន ចេះតែលបលួចឆាន់ស្រាក្នុងវត្តជាប្រចាំ លុះក្រោយពីឆាន់ស្រាស្រវឹងធ្លាក់ភ្នែក ស្រាប់តែផ្ទុះហិង្សាវ៉ៃកូននេនមួយអង្គបណ្តាលឱ្យរងរបួស លុះខឹងនឹងពុទ្ធបរិស័ទចូលមកឃាត់ ក៏ទាញកាំបិតដេញកាប់ថែមទៀត បង្កឱ្យមានការភ្ញាក់ផ្អើល ដល់ព្រះចៅអធិការវត្តចាប់ផ្សឹក ប្រគល់ឱ្យសមត្ថកិច្ចនាំយកទៅចាត់ការតាមច្បាប់។
ហេតុការណ៍សង្ឈចំណាស់ឆាន់ស្រាស្រវឹង វ៉ៃកូននេន និងដេញកាប់ពុទ្ធបរិស័ទផ្អើលវត្តនេះ បានកើតមានការភ្ញាក់ផ្អើលឡើង លុះនៅវេលារសៀលថ្ងៃទី១៤ ខែតុលា ឆ្នាំ២០១៨ នៅចំណុចបរិវេណវត្តក្រោលជី ស្ថិតក្នុងឃុំពពេល ស្រុកបរិបូរណ៍។ លុះមកដល់វេលាម៉ោង៥ល្ងាចថ្ងៃដដែល ព្រះចៅអធិការ រួមនឹងមន្ត្រីការិយាល័យធម្មការ និងសាសនាស្រុក ចាប់ផ្សឹក ដើម្បីប្រគល់ខ្លួនឱ្យសមត្ថកិច្ច។
ដោយពិនិត្យមើលឃើញថា ព្រះសង្ឃ ង៉ែត ង៉ាន់ បានប្រព្រឹត្តិខុសវិន័យសង្ឃ និងខុសច្បាប់រដ្ឋ ទើប ព្រះចៅអធិការវត្តក្រោលជី បានសម្រេចចាប់ផ្សឹកព្រះសង្ឃង៉ែត ង៉ាន់ រួចប្រគល់ឱ្យសមត្ថកិច្ច ដើម្បីនាំយកទៅសាកសួរ និងរៀបចំកសាងសំណុំរឿង បញ្ជូនទៅចាត់ការបន្តតាមនីតិវិធី។/