ភ្នំពេញ៖ ជាងដែក២នាក់ទំនងជាប្រាក់ខែចាយមិនគ្រប់ បានបែកគំនិតទិញស្បង់ចីវរ មកពាក់ រួចដើររៃអង្គាសលុយយកមកសុីចាយ ដេកផ្ទះសំណាក់ រហូតដល់ប្រជាពលរដ្ឋតាមទាន់ ក៏ប្តឹងសមត្ថកិច្ចឲ្យចាប់ខ្លួន កាលពីវេលាម៉ោង៨និង៣០នាទីព្រឹក ថ្ងៃទី១៧ ខែវិច្ឆិកា ឆ្នាំ២០១៨ ស្ថិតនៅក្នុងភូមិថ្មគោល១ សង្កាត់ចោមចៅ២ ខណ្ឌពោធិ៍សែនជ័យ រាជធានីភ្នំពេញ។
សង្ឃក្លែងក្លាយ២នាក់នេះ ១. ឈ្មោះ ធី សុី អាយុ១៨ឆ្នាំ មុខរបរជាងដែក នៅសង្កាត់ច្បារអំពៅ ខណ្ឌច្បារអំពៅ មានស្រុកកំណើតភូមិដំបូកខ្ពស់ ឃុំដំបូកខ្ពស់ ស្រុកអង្គជ័យ ខេត្តកំពត (ឃាត់ខ្លួន) ២. ឈ្មោះ ភក្តី ភេទប្រុស អាយុ២១ឆ្នាំ មុខរបរ ជាងដែក ស្រុកកំណើតនៅខេត្តព្រៃវែង (គេខ្លួនបាត់)។ អ្នកទាំង២ ជាមិត្តភក្តិរួមការងារជាមួយគ្នា។
តាមប្រភពបានឲ្យដឹងថា រៀងរាល់ព្រឹក គេតែងតែឃើញលោកសង្ឃក្លែងក្លាយ២នាក់នេះ ដើរបិណ្ឌបាត្ររៃអង្គាសលុយតាមផ្លូវជាប្រចាំ។ ដោយមានចម្ងល់ដោយសារតែលោកសង្ឃក្លែងក្លាយទាំង២នាក់ ម្តងរៃអង្គាសទិញនេះ ម្តងរៃអង្គាសទិញនោះ ប្រជាពលរដ្ឋកើតចម្ងល់ ក៏នាំគ្នាតាមដាន ក៏ប្រទះឃើញជនទាំង២ ដេកផ្ទះសំណាក់ ចាប់ខ្លួនបានម្នាក់ ប្រគល់ឲ្យសមត្ថកិច្ច ចំណែកម្នាក់ទៀតរត់គេចខ្លួនបាត់។
ក្រោយចាប់ខ្លួន ជនកំហូចរូបនេះ បានឲ្យដឹងថា “ពួកគាត់ពិតជាមានមុខរបរជាជាងដែក ដោយ១ខែ ទទួលបាន១៨០ដុល្លារ តែប្រាក់ខែស៊ីចាយមិនគ្រប់គ្រាន់ ក៏បែកគំនិតនាំគ្នាទៅរកទិញស្បងចីវមកស្លៀក ហើយដើររៃអង្គាសលុយតាមទីសាធារណ: អស់រយ:ពេលជាង១០ថ្ងៃមកហើយ ទើបតែរយ:ពេល៥ថ្ងៃនេះ មកសម្ងំស្នាក់នៅក្នុងខណ្ឌពោធិ៍សែនជ័យ ថ្ងៃឡើងស្លៀកស្បងដើររៃអង្គាសលុយក្នុងភូមិថ្មគោល បានលុយក្នុង១ថ្ងៃ ជាង១០ម៉ឺនរៀល ស៊ីចាយពេលយប់ ដេកផ្ទះសំណាក់ លុះដល់ព្រឹកថ្ងៃទី១៧ ខែវិច្ឆិកា នេះ គេបានចេញពីផ្ទះសំណាក់ ដើររៃអង្គាសលុយទើបតែបានជាង២ម៉ឺនរៀល ត្រូវពលរដ្ឋតាមទាន់ដឹង បែកធ្លាយរឿង ឃាត់ខ្លួននាំទៅសាលាសង្កាត់ចោមចៅ២ តែម្តង៕
បច្ចុប្បន្ន ជនសង្ស័យរូបនេះ សមត្ថកិច្ចកំពុងសួរនាំ និងរៀបចំឯកសារបញ្ជូនខ្លួនទៅកាន់អធិការនគរបាលខណ្ឌពោធិ៍សែនជ័យ បន្តនីតិវិធី៕