បន្ទាយមានជ័យ ៖ កាលពីថ្ងៃទី០២ ខែធ្នូ ឆ្នាំ២០១៨ វេលាម៉ោង១២និង៤៥នាទី កម្លាំងជំនាញព្រហ្មទណ្ឌ សហការជាមួយកម្លាំងអន្តរាគមន៍កងរាជអាវុធហត្ថខេត្ត ដឹកនាំដោយលោកវរសេនីយ៍ឯក ម៉ែន ភិរម្យ មេបញ្ជាការរងកងរាជអាវុធហត្ថខេត្ត ទទួលការងារយុត្តិធម៌ បានជនសង្ស័យម្នាក់ចាក់សម្លាប់គូទំនាស់ នៅក្លឹបកំសាន្តហ្គោលថោន ស្ថិតនៅភូមិក្បាលស្ពាន សង្កាត់ព្រះពន្លា ក្រុងសិរីសោភ័ណ ។
ជនសង្ស័យមានឈ្មោះ ស៊ុយ ឧត្តម ភេទ ប្រុស អាយុ ១៨ឆ្នាំ ជនជាតិខ្មែរ បច្ចុប្បន្នរស់នៅភូមិតារាងបាល់ សង្កាត់កំពង់ស្វាយ ក្រុងសិរីសោភ័ណ។ ចំណែកជនរងគ្រោះ មានឈ្មោះលាង ឡេង ភេទប្រុស អាយុ២២ឆ្នាំ។
បើតាមការឲ្យដឹងពីលោកវរសេនីយ៍ឯក ម៉ែន ភិរម្យ ថា យោងពាក្យបណ្តឹងរបស់ឈ្មោះអ៊ុក ដារ៉ា ភេទប្រុស អាយុ៤០ឆ្នាំ ត្រូវជាបងជីដូនរបស់ជនរងគ្រោះ បច្ចុប្បន្នរស់នៅភូមិកំពង់ស្វាយ សង្កាត់កំពង់ស្វាយ ក្រុងសិរីសោភ័ណ និងដោយទទួលបានការសម្របសម្រួលពីលោកមាស ច័ន្ទពិសិដ្ឋ ព្រះរាជអាជ្ញាអមសាលាដំបូងខេត្ត លោកបានដឹកនាំកម្លាំងចុះធ្វើការឃាត់ខ្លួនជនសង្ស័យម្នាក់ ឈ្មោះស៊ុយ ឧត្តម ពីបទមនុស្សឃាត ខណៈដែលកាលពីយប់ថ្ងៃទី០២ ខែធ្នូ ឆ្នាំ២០១៨ ជនសង្ស័យនិងបក្ខពួកចំនួន១០នាក់ទៀត បានចូលទៅលេងកម្សាន្តក្នុងក្លឹបកំសាន្តហ្គោលថោន ផឹកសុីស្រវឹងជោគ ក៏ផ្ទុះជម្លោះចវាយតប់ជាមួយក្រុមផឹកស៊ីម្ខាងទៀត មានគ្នា៣នាក់ ស្របពេលនោះជនសង្ស័យបានយកកាំបិតចុងស្រួចចាក់ទៅលើជនរងគ្រោះ បណ្តាលឲ្យជនរងគ្រោះដួល និងហូរឈាមយ៉ាងខ្លាំងនៅកន្លែងកើតហេតុ បន្ទាប់ពីធ្វើសកម្មភាពរួចបក្ខពួករបស់ជនសង្ស័យបានរត់គេចខ្លួនអស់ នៅសល់តែជនសង្ស័យម្នាក់ប៉ុណ្ណោះនៅកន្លែងកើតហេតុ ក៏ត្រូវសមត្ថកិច្ចចាប់ខ្លួនតែម្តង។
ក្រោយពីចាប់ខ្លួន ជនសង្ស័យបានសារភាពថា ខ្លួនពិតជាបានចាក់សម្លាប់ជនរងគ្រោះប្រាកដមែន។
បច្ចុប្បន្ន កម្លាំងជំនាញបានកសាងសំណុំរឿងបញ្ជូនជនសង្ស័យទៅតុលាការ ដើម្បីចាត់ការទៅតាមនីតិវិធី៕