ឱក សុគន្ធកញ្ញា ទើបតែវិលត្រឡប់មកពីក្រេបចន្ទទឹកឃ្មុំ (Honey Moon) រយៈពេលជាង3សប្តាហ៍ នៅប្រទេសចំនួន7 គឺបារាំង, ប៊ែលហ្សិក, ហូឡង់, អូទ្រីស, អូស្ត្រាលី, អ៊ីតាលី និងអាឡឺម៉ង់ ដែលជាតារាខ្មែរទី1 ហើយដែលបានរៀបមង្គលការធំជាងគេ ហើយមានដំណើរកម្សាន្តច្រើនប្រទេសជាងគេ។
ទោះជាយ៉ាងណា ក្រោយមកដល់ស្រុកវិញ កាលពីពេលថ្មីៗនេះ ប្អូនថ្លៃថៅកែហង្សមាស រូបនេះ បានចាប់ផ្តើមសម្រុកបន្តអាជីពសិល្បៈឡើងវិញភ្លាម ដោយគ្មានការបង្អង់យូរ នាំតែខាតលុយឡើយ។
សុគន្ធកញ្ញា បានឃោសនាកម្មវិធីប្រលងចម្រៀង X Factor Cambodia ដែលនៅក្រោមការគ្រប់គ្រង និងដឹកនាំកម្មវិធីទាំងស្រុង ដោយស្វាមីរបស់នាង លោកអ៊ឹង សុខលី ខណៈដែលសុគន្ធកញ្ញា ក៏ជាគ្រូបង្វឹកក្នុងកម្មវិធីប្រលងចម្រៀងមួយនេះផងដែរ។
បើទោះជាមហាជនមួយចំនួន រួមទាំងតារាកំពូលទើស ម៉ៃ សុគន្ធ បានបញ្ចោញយោបល់ថា សុគន្ធកញ្ញា ចេញធ្វើជាគ្រូបង្វឹក និងគណៈកម្មការច្រើនពេក ចង់សាំហើយ គួរតែដាក់ពេជ្រ សោភា ឱ្យចូលម្តង ព្រោះនាងក៏ជាតារាមានសមត្ថភាពគ្រប់គ្រាន់ក៏ដោយ។ តែសុខលី មិនអើពើឡើយ ព្រោះលោកទុកចិត្តភរិយាជាងតារាផ្សេងទៀត ទើបមិនចាំបាច់ផ្លាស់ប្តូរទេ។
ក្រៅពីត្រូវស្វាមីលើកតម្កើងថែមទៀត ឱក សុគន្ធកញ្ញា ដែលវិលត្រឡប់មកពីដំណើរកម្សាន្តក្រេបចន្ទទឹកឃ្មុំជិត1ខែនេះ គេឃើញសម្រស់របស់នាងមានការប្រែប្រួល ពិសេសតាមរយៈការឃោសនាកម្មវិធី X Factor Cambodia នោះ មហាជនលាន់មាត់ថា សុគន្ធកញ្ញា ពេលនេះឡើងកាម៉ាប់ៗតែម្តង មើលទៅបែបញាំម្ហូបបែបអឺរ៉ុបច្រើនពេកហើយ។
ក្រុមអ្នកគាំទ្រសុគន្ធកញ្ញា ថា ប្អូនថ្លៃថៅកែហង្សមាស រូបនេះ គួរតែប្រញាប់សម្រកគីឡូវិញ ទើបអាចរក្សាតំណែងបាន៕
