ភ្នំពេញ ៖ សឹងមិនគួរឲ្យជឿ នៅរយៈពេលចុងក្រោយនេះ ជីវិតរបស់អ្នកនាងស្វែង សុជាតា ហាក់មានយីអ៊ុនឡើងក្រឺតៗ ហើយពេលនេះអ្នកនាងបានបង្ហាញនូវផ្ទះ១ល្វែង និងជិះរថយន្តទំនើបថែមទៀតផង។
តារាស្រីដែលគេស្គាល់តាមរយៈការសម្តែងជាតួកាច គឺអ្នកនាងស្វែង សុជាតា បានបង្ហោះសារថា “សំរាកពីការងារ មកសំអាតផ្ទះថ្មីម្តង”។
យ៉ាងណា ការបង្ហាញផ្ទះថ្មីនេះ បានធ្វើឲ្យមហាជនមានការភ្ញាក់ផ្អើលជាខ្លាំង ហើយអ្នកខ្លះសង្ស័យថា អ្នកនាងស្វែង សុជាតា កំពុងមានអ្នកនៅពីក្រោយឧបត្ថម្ភទៀតផង។
ប៉ុន្តែអ្នកនាងស្វែង សុជាតា បានប្រាប់ថា អ្នកនាងទើបតែបានទិញផ្ទះថ្មីនេះប្រាកដមែន និងត្រៀមចូលទៅរស់នៅហើយ។ ផ្ទះនេះ អ្នកនាងទិញក្នុងតម្លៃប្រមាណជា១០ម៉ឺនដុល្លារ ដែលមានទីតាំងស្ថិតនៅទល់មុខរោងចក្រផលិតស្រាបៀកម្ពុជា ក្នុងសង្កាត់ជើងឯក ខណ្ឌដង្កោ។
អ្នកនាងសុជាតា បានប្រាប់ទៀតថា អ្នកនាងបានសន្សំប្រាក់ដែលខំប្រឹងដោយកម្លាំងញើសឈាមពីសិល្បៈរាប់ឆ្នាំ យកទៅទិញផ្ទះថ្មីនេះ ទើបសម្រេចក្តីសុបិនដែលនាងប៉ងរាប់ឆ្នាំទៅហើយ ពោលគឺមិនមានអ្នកណាឧបត្ថម្ភពីក្រោយទេ ហើយផ្ទះថ្មីនេះ អ្នកនាងមិនទាន់មានគម្រោងធ្វើពិធីជប់លៀងនោះទេ។
គួរបញ្ជាក់ថា កាលពីមុន ជីវិតរបស់អ្នកនាងស្វែង សុជាតា ត្រូវបានគេដឹងថា លំបាកលំបិនខ្លាមងណាស់ដោយសារតែជំងឺតាមព្យាបាទ។ ប៉ុន្តែរយៈពេលចុងក្រោយ អ្នកនាងបានប្រកបរបររកស៊ីផ្ទាល់ខ្លូន និងឆ្លៀតពេលសម្តែង រហូតទទួលបានជោគជ័យមានផ្ទះនិងឡានទំនើបជិះ៕
