រដ្ឋមន្ត្រីសុខាភិបាល ក្រើនរំលឹកពលរដ្ឋប្រុងប្រយ័ត្នជំងឺគ្រុនឈាម

ភ្នំពេញៈ លោកសាស្ត្រាចារ្យ ឈាង រ៉ា រដ្ឋមន្ត្រីក្រសួងសុខាភិបាល បានថ្លែងថាដោយសាររដូវធ្លាក់ភ្លៀងបានចូលមកដល់ ដូច្នេះសូមអំពាវនាវដល់ប្រជាពលរដ្ឋ ប្រុងប្រយ័ត្នខ្ពស់ចំពោះជំងឺគ្រុនឈាម ដោយការការពារនិងលុបបំបាត់ជម្រកមូសនៅជុំវិញបរិវេណគេហដ្ឋាន និងសហគមន៍យើង ព្រោះជំងឺមួយនេះអាចឆក់យកជីវិតយើងបានគ្រប់ពេលនិងគ្រប់វ័យ ពិសេសទារក-កុមារ ស្ត្រីមានផ្ទៃពោះ និងមនុស្សចាស់ បើយើងមានការធ្វេសប្រ ហែស។

ការថ្លែងរបស់លោកសាស្ត្រាចារ្យ បានធ្វើឡើង កាលពីរសៀលថ្ងៃទី២៧ ខែសីហា ឆ្នាំ២០២៥ ក្នុងឱកាសដឹកនាំប្រតិភូក្រសួងសុខាភិបាល អញ្ជើញចុះពិនិត្យការរៀបចំកន្លែងចត្តាឡីស័ក នៅអាកាសយានដ្ឋានអន្តរជាតិ តេជោ ដែលមានការអញ្ជើញចូលរួមពីថ្នាក់ដឹកនាំក្រសួង មន្ទីរពេទ្យជាតិ និងមន្ត្រីចត្តាឡីស័ក រួមទាំងតំណាងរដ្ឋលេខាធិការដ្ឋានអាកាសចរណ៍ស៊ីវិល និងលោកឧកញ៉ានាយកក្រុមហ៊ុនវិនិយោគអាកាស យានដ្ឋានកម្ពុជា CAIC។

លោកសាស្ត្រាចារ្យរដ្ឋមន្ត្រីបានថ្លែងបន្តថា សូមប្រជាពលរដ្ឋយើងការពារខ្លួនពីមូសខ្លា តាមរយៈសម្រាន្តក្នុងមុងជានិច្ច កម្ចាត់ជម្រកមូសខ្លា ដាក់ថ្នាំអាបែត នៅក្នុងអាងទឹក ឬពាងទឹក និងបាញ់ថ្នាំមូស ជាដើម។ លោករដ្ឋមន្ត្រី បានគូសបញ្ជាក់ថា បើមានបញ្ហាសុខភាព សង្ស័យថាមានជំងឺគ្រុនឈាម សូមប្រញាប់ទៅកាន់មន្ទីរពេទ្យបន្ទាន់។

គួរបញ្ជាក់ថា ករណីជំងឺគ្រុនឈាម នៅឆ្នាំ២០២៥ នេះ មានការកើនឡើងជាងឆ្នាំ២០២៤ ប៉ុន្តែករណីស្លាប់ដោយជំងឺនេះ បានថយចុះជាងឆ្នាំមុន៕