ភ្នំពេញ ៖ តារាសម្ដែង និងកំប្លែង លោកខេង រតនៈ ហៅនាយព្រែក បានប្រកាសចូលរោងការជាមួយស្រីស្រស់ ឈិន មុនីនាថ កូនស្រីតារាចម្រៀងលោកឈិន កុសល និងត្រូវជាក្មួយស្រីរបស់អតីតពិធីការិនី ឈិន ច័ន្ទសុធារី នៅថ្ងៃទី៧ ខែធ្នូ ឆ្នាំ២០២៥ ខាងមុខនេះហើយ ។ ការកំណត់ថ្ងៃចូលរោងការរបស់នាយព្រែក និងមុនីនាថ នាពេលនេះ ក្រោយពីពួកគេស្រលាញ់គ្នា រយៈពេល៦ឆ្នាំ ហើយនាយព្រែក បាន Surprise គូស្នេហ៍ តាមរយៈការរៀបចំពិធីសុំគូស្នេហ៍រៀបការ (Will You Marry Me ?) និងកំណត់ថ្ងៃរៀបការ (Save The Date) នៅសណ្ឋាគារ Faifield កាលពីថ្ងៃទី២៨ ខែសីហា ឆ្នាំ២០២៥។
កូនក្រមុំរបស់លោកឈិន កុសល កញ្ញាមុនីនាថ រំភើបរហូតដល់ស្រក់ទឹកភ្នែក នៅពេលដែលនាយព្រែក លុតជង្គង់សុំនាងរៀបការ និងបំពាក់ចិញ្ចៀនពេជ្រមួយវង់ឲ្យនាង ដើម្បីបញ្ជាក់ថា នាងគឺជាគូដណ្ដឹងរបស់ខ្លួន ។
ឈិន មុនីនាថ និយាយរំលឹករឿងស្នេហាជាមួយនាយព្រែក ថាពេលដែលនាងទាក់ទងស្រលាញ់គ្នាជាមួយលោកខេង រតនៈ ដំបូងនាងបានប្រាប់មិត្តភក្ដិ មុនប្រាប់អ្នកផ្ទះនាង ហើយពួកម៉ាក ចង់ឲ្យនាងស្វែងយល់ចិត្តគ្នាសិនទៅ កុំឲ្យខូចចិត្ត។ នាងថា ស្រលាញ់គ្នា អត់ទាមទារអ្វីច្រើនទេ ព្រោះលុយពិបាករក។ នាងបន្ថែមថា រូបនាងមិនមែនជាមនុស្សសម្ភារៈនិយមដែលទាមទាររបស់ល្អៗពីនាយព្រែក ទេ ហើយតាំងពីស្រលាញ់គ្នាមក នាងមិនដែលទាមទាររបស់ល្អៗពីលោក រតនៈ ទេ ព្រោះបើនាងជាមនុស្សចូលចិត្តសម្ភារៈនិយម ម៉្លេះនាងនឹងយកប្ដីអ្នកមានជាងនេះ មិនមែនយកអ្នកមានជីវភាពប្រហាក់ប្រហែលគ្នាឡើយ។
ចំណែកលោកខេង រតនៈ ហៅនាយព្រែក បាននិយាយថា លោកស្រលាញ់មុនីនាថ ព្រោះតែនាងស្អាត ហើយ ពេលបានស្គាល់នាងមានអារម្មណ៍កាន់តែស្រលាញ់ ព្រោះស្អាតបែបជាតួឯកកុន ជានារីរឹងមាំ អាចធ្វើអ្វីដោយខ្លួនឯងបាន អត់ចូលចិត្តហាមលោកច្រើន អត់ទាមទារច្រើន។ លោកថា ចំណងស្នេហា ៦ឆ្នាំនេះ លោកបានឆ្លងកាត់ឧបសគ្គច្រើនជាមួយនាង ទាំងពាក្យខ្លះគេនិយាយមិនល្អដាក់លោក និងមុនីនាថ ប៉ុន្ដែបច្ចុប្បន្ន ឈានដល់ដំណាក់កាលច្បាស់លាស់ជាមួយគ្នា ។
សូមបញ្ជាក់ថា នាយព្រែក ជាកូនអ្នកកំប្លែង អាយ៉ៃ អ្នកស្រី នួន សារី ហៅយាយយ៉យ ហើយលោករតនៈ ឈានចូលសម្ដែង តាំងពីតូច ជាមួយលោកព្រាប សុវត្ថិ រឿង «នេសាទក្រពើ» ។ លោករតនៈ មុនបង្កាត់ភ្លើងស្នេហាជាមួយតារាសម្ដែង ឈិន មុនីនាថ លោកបានភ្ជាប់ពាក្យជាមួយកូនក្រមុំអ្នកខេត្តកំពង់ចាម ឈ្មោះជា ស្រីតី កាលពីឆ្នាំ២០១៦ តែបានចែកផ្លូវគ្នានៅឆ្នាំ២០១៩ ទាំងចម្រូងចម្រាស ។ ក្រោយបែកពីគូដណ្ដឹងភ្លាម នាយព្រែក បានភ្ជាប់ស្នេហ៍ជាមួយឈិន មុនីនាថ នៅឆ្នាំ២០១៩ ដែលចំណងស្នេហានេះ មានការគាំទ្រពីម្ដាយ យាយយ៉យ និងឪពុករបស់មុនីនាថ អតីតតារាចម្រៀងលោកឈិន កុសល ។ មុនីនាថ ថាដោយសាតែនាយព្រែក ចូលចិត្តលេងសើចច្រើន ទើបពីដំបូង នាងមិនសូវទុកចិត្តដែរ ហេតុនេះហើយបានជាប្រើពេលមើលចិត្តថ្លើមគ្នាដល់ទៅ ៦ឆ្នាំ ។ ប៉ុន្ដែពេលលោក រតនៈ សុំនាងរៀបការតែម្ដង នាងឆ្លើយ OK ទាំងរំភើបដល់ស្រក់ទឹកភ្នែក ៕
