ភ្នំពេញ ៖ យុវតីជាបេក្ខភាពប្រឡងសញ្ញាបត្រមធ្យមសិក្សាទុតិយភូមិ (បាក់ឌុប) មួយរូប បានធ្វើឱ្យមហាជនចាប់អារម្មណ៍ និងសម្តែងនូវការកោតសរសើរយ៉ាងខ្លាំង ខណៈដែលយុវតីរូបនេះ ពិការដៃទាំងសងខាង ត្រឹមស្មា ចំណែកជើងខាងស្តាំ ក៏ពិការដូចគ្នា (ស្វិត) ហេតុនេះត្រូវប្រើជើងខាងឆ្វេង ដើម្បីសរសេរកិច្ចការប្រឡងបញ្ចប់ការសិក្សា ដែលខ្លួនខំប្រឹងតស៊ូរៀនសូត្រអស់រយៈពេល១២ឆ្នាំ មកហើយ។
យុវតីពិការដៃទាំងសងខាង ដែលជាបេក្ខនារីប្រឡងបាក់ឌុបនោះ មានឈ្មោះឈឿន សំណាង ជាសិស្សថ្នាក់ទី១២ នៃវិទ្យាល័យព្រែកលៀបជំនាន់ថ្មី និងជាបេក្ខជនប្រឡងសញ្ញាបត្រមធ្យមសិក្សាទុតិយភូមិ (បាក់ឌុប) នៅមណ្ឌលវិទ្យាល័យព្រះស៊ីសុវត្ថិ រាជធានីភ្នំពេញ។
យុវតីឈឿន សំណាង បានបញ្ជាក់ប្រាប់ថា នាងជាសិស្សថ្នាក់ទី១២ នៃវិទ្យាល័យព្រែកលៀបជំនាន់ថ្មី ដោយ សារតែនាងពិការដៃទាំងសងខាង ហេតុនេះ នាងត្រូវប្រើជើងខាងឆ្វេង ដើម្បីសរសេរជំនួសដៃ ខណៈដែលជើងស្តាំរបស់នាង ក៏ពិការដែរ (ស្វិត) ប្រើការអ្វីមិនកើតនោះ ឡើយ។ ចំពោះការប្រឡងនៅក្នុងបន្ទប់ បេក្ខជនផ្សេងៗ គេអង្គុយប្រឡងនៅលើតុ ចំណែករូបនាង ត្រូវអង្គុយនៅធ្នើរក្តារជាប់ជាប់ក្តារខៀន (កន្លែងគ្រូឈរបង្រៀន)។
យុវតីឈឿន សំណាង បានរៀបរាប់ថា “ខ្ញុំយកជើងឆ្វេង សរសេរជំនួសដៃ ហើយខ្ញុំប្រើហ្នឹងបានតែ ១ចំហៀងនេះទេ ព្រោះជើងស្តាំខ្ញុំ វាស្វិត ហើយសម្រាប់ការសរសេររបស់ខ្ញុំ វាយឺតយ៉ាវជាងគេ ដោយសារតែគេសរសេរដៃ ខ្ញុំសរសេរជើង អ៊ីចឹងវាអាចមានបញ្ហាសម្រាប់ការសរសេរ ដោយសារពេលសរសេរចន្លោះជើងដែលកៀបប៊ិកសរសេរ ក៏វាឈឺ អ៊ីចឹងវាធ្វើឱ្យប៉ះពាល់ដល់អារម្មណ៍ និងការផ្ចិតផ្ចង់ តែយ៉ាងណា នាងខ្ញុំធ្វើបានពី ៧០ ទៅ៨០ភាគរយដែរ ប៉ុន្តែចំពោះលទ្ធផលយ៉ាងណា ក៏ខ្ញុំទទួលយកដែរ…”។
យុវតីឈឿន សំណាង បានបន្តថា ពេលខ្លះនាងក៏ចង់បោះបង់ចោលការសិក្សាដែរ ប៉ុន្តែមិនដាច់ចិត្ត ហេតុនេះមានតែខំតាំងចិត្តខិតខំបន្តទៅមុខទៀត រហូតដល់សព្វថ្ងៃ អាចមានឱកាសប្រឡងបាក់ឌុប ដូចយុវជនយុវតីដទៃទៀតដែរ។ ចំពោះក្តីស្រមៃរបស់នាង ដោយសារតែនាង ពិការដៃនិងជើង មិនអាចធ្វើការងារអ្វីធ្ងន់ ឬច្រើនយ៉ាងដូចគេ ហេតុនេះនាងមានបំណងធ្វើការងារខាងផ្នែកព័ត៌មានវិទ្យា (អាយធី) ព្រោះការងារមួយនេះ អាចអង្គុយធ្វើការនៅនឹងកន្លែងបាន ណាមួយនាងធ្លាប់បានរៀនសូត្រជំនាញកុំព្យូទ័រ ជាច្រើនឆ្នាំមកហើយដែរ។
អ្នកស្រី ណាំ សុផាន ត្រូវជាម្តាយបង្កើតរបស់យុវតី ឈឿន សំណាង បានបញ្ជាក់ប្រាប់ថា កូនស្រីរបស់អ្នកស្រី កើតមកគឺពិការតែម្តង ដោយអត់មានដៃទាំងសងខាង ចំណែកជើងក៏ខ្វិនខ្វង់ថែមទៀត តែសំណាងល្អ ដែលកូនស្រីគាត់អាចនៅសល់ជើងខាងឆ្វេងម្ខាង សម្រាប់ប្រើប្រាស់ជំនួសដៃ រាប់តាំងពីការហូបចុក ពិសេសការ រៀនសូត្រ (កាន់ប៊ិកសរសេរ)។
ម្តាយយុវតី បានរៀបរាប់ថា “កូនខ្ញុំកើតមកវាពិការអ៊ីចឹងហ្មង កើតមកអត់មានដៃ ហើយជើងរាងខ្វេរ តែនេះយើងពត់បានប៉ុណ្ណឹង យើងខំពត់ទៅ រាងបានគ្រាន់បើ ពេលហ្នឹង ខ្ញុំតក់ស្លុតណាស់ ប៉ុន្តែខ្ញុំតាំងចិត្តថា ត្រូវមើលថែកូនឱ្យអស់ពីលទ្ធភាព…”។
ក្រសួងអប់រំ យុវជននិងកីឡា បានថ្លែងកោតសរសើរយុវតីខាងលើ ដែលមានពិការភាព តែប្រឹងប្រែងតស៊ូរៀនសូត្រ រហូតបានចូលរួមប្រឡងសញ្ញាបត្រមធ្យមសិក្សាទុតិយភូមិ សម័យប្រឡង ២៨ សីហា ២០២៥ យុវតីរូបនេះ ទោះបីជាកាយសម្បទាមិនគ្រប់គ្រាន់ តែមានបេះដូងពោរពេញដោយឆន្ទៈនិងក្តីសង្ឃឹម…៕