ខេត្តកំពង់ចាម ៖ ជនដៃដល់ជាឃាតករដ៏សាហាវឃោរឃៅ ដែលអារកសម្លាប់ប្រពន្ធកំពុងមានផ្ទៃពោះ៥ខែ និងក្រុមគ្រួសារខាងប្រពន្ធ សរុប១០នាក់ រួចចាក់សាំងដុតសពក្នុងផ្ទះ កាលពីវេលាទៀបភ្លឺ ថ្ងៃទី២៣ ខែវិច្ឆិកា ឆ្នាំ២០២៥ នៅចំណុចផ្ទះចាំចម្ការ ១កន្លែង ស្ថិតក្នុងស្រុកស្ទឹងត្រង់ នោះ ត្រូវបានសាលាដំបូងខេត្តកំពង់ចាម ចេញដីកាសម្រេចឃុំខ្លួនបណ្តោះអាសន្ន ដាក់ពន្ធនាគារ នៅថ្ងៃទី២៧ ខែវិច្ឆិកា ឆ្នាំ២០២៥ ដើម្បីបន្តកិច្ចស៊ើបសួរតាមនីតិវិធី។
អ្នកនាំពាក្យសាលាដំបូង និងអយ្យការអមសាលាដំបូងខេត្តកំពង់ចាម បានបញ្ជាក់ថា កាលពីថ្ងៃទី២៣ ខែវិច្ឆិកា ឆ្នាំ២០២៥ មានករណីឃាតកម្ម និងឃាតកម្មគិតទុកជាមុន សម្លាប់ជនរងគ្រោះ ចំនួន៩នាក់ នៅភូមិទួលសំបូរ ឃុំទួលសំបូរ ស្រុកស្ទឹងត្រង់ ខេត្តកំពង់ចាម ដែលមានជនសង្ស័យ ឈ្មោះសុបិន មិនា ភេទប្រុស កើតថ្ងៃទី១ ខែកញ្ញា ឆ្នាំ២០០៥ អាយុ២០ឆ្នាំ ហើយសមត្ថកិច្ចបានឃាត់ខ្លួនជនសង្ស័យ បញ្ជូនមកអយ្យការអមសាលាដំបូងខេត្តកំពង់ចាម។
នៅថ្ងៃទី២៦ ខែវិច្ឆិកា ឆ្នាំ២០២៥ អយ្យការអមសាលាដំបូងខេត្តកំពង់ចាម បានទទួលចាត់ការសំណុំរឿង លេខ ១១០៦ ចុះថ្ងៃទី២៦ ខែវិច្ឆិកា ឆ្នាំ២០២៥ ពាក់ព័ន្ធនឹងករណីឃាតកម្ម និងឃាតកម្មគិតទុកជាមុន ដែលមានជនត្រូវចោទ ឈ្មោះសុបិន មិនា ត្រូវបានតំណាងអយ្យការ ចោទប្រកាន់ តាមរយៈដីកាសន្និដ្ឋានបញ្ជូនរឿងឱ្យស៊ើបសួរ លេខ ៧៩៧ អ.យ.ឆ/២៥ ចុះថ្ងៃទី២៧ ខែវិច្ឆិកា ឆ្នាំ២០២៥ ទៅចៅក្រមស៊ើបសួរ នៃសាលាដំបូងខេត្តកំពង់ចាម។
សាលាដំបូងខេត្តកំពង់ចាម បានទទួលចាត់ការសំណុំរឿងព្រហ្មទណ្ឌលេខ ១១០៦ ចុះថ្ងៃទី២៦ ខែវិច្ឆិកា ឆ្នាំ២០ ២៥ ដែលមានជនត្រូវចោទឈ្មោះសុបិន មិនា ត្រូវបានចោទប្រកាន់ពីបទ “ឃាតកម្ម និងឃាតកម្មគិតទុកជាមុន” កាលពីថ្ងៃទី២៣ ខែវិច្ឆិកា ឆ្នាំ ២០២៥ ប្រព្រឹត្តនៅ ចំណុចតំបន់កៀនឃ្លាំង ស្ថិតនៅភូមិទួលសំបូរ ឃុំទួលសំបូរ ស្រុកស្ទឹងត្រង់ ខេត្តកំពង់ចាម បទល្មើសដែលមានចែងនិងបញ្ញត្តឱ្យផ្តន្ទាទោស តាមមាត្រា១៩៩ និងមាត្រា២០០ នៃក្រមព្រហ្មទណ្ឌ។
បន្ទាប់ពីបានសាកសួរជនត្រូវចោទខាងលើ និងបានពិនិត្យភ័ស្តុតាងដែលមានក្នុងសំណុំរឿង ចៅក្រមស៊ើបសួរនៃសាលាដំបូងខេត្តកំពង់ចាម បានចេញដីកាសម្រេចឃុំខ្លួនបណ្តោះអាសន្នលេខ ២២៥៣ “ញ” ព្រ.១/២៥ ចុះថ្ងៃទី២៧ ខែវិច្ឆិកា ឆ្នាំ២០២៥ និងដីកាបង្គាប់ឱ្យឃុំខ្លួន លេខ ២២៥៤ “ញ” ព្រ.១/២៥ ចុះថ្ងៃទី២៧ ខែវិច្ឆិកា ឆ្នាំ២០ ២៥ លើឈ្មោះសុបិន មិនាំ ជាបណ្តោះអាសន្ន នៅពន្ធនារគារខេត្តកំពង់ចាម ដើម្បីបន្តកិច្ចស៊ើបសួរតាមនីតិវិធី។
អ្នកនាំពាក្យសាលាដំបូង និងអយ្យការអមសាលាដំបូងខេត្តកំពង់ចាម សូមបញ្ជាក់បន្ថែមផងដែរថាសាលា ដំបូងខេត្តកំពង់ចាម នឹងមានវិធានការបន្តយ៉ាងតឹងរ៉ឹង ស្របតាមច្បាប់ ចំពោះជនត្រូវចោទខាងលើ។
គួររំលឹកថា កាលពីវេលាម៉ោង៥ទៀបភ្លឺ ថ្ងៃទី២៣ ខែវិច្ឆិកា ឆ្នាំ២០២៥ មានករណីអំពើឃាតកម្មដ៏សាហាវឃោរឃៅមួយ បានកើតឡើងនៅចំណុចផ្ទះចាំចម្ការ ១កន្លែង ស្ថិតក្នុងភូមិពោន ឃុំទួលសំបួរ ស្រុកស្ទឹងត្រង់ ដោយបុរសចិត្តកំណាចឃោរឃៅម្នាក់ បានកើតមានជម្លោះជាមួយនឹងប្រពន្ធរបស់ខ្លួន ដែលកំពុងមានផ្ទៃពោះ លុះ ខឹងប្រពន្ធរត់ទៅផ្ទះម្តាយបង្កើតរបស់នាង ស្រាប់តែមានកំហឹងនិងគំនុំអាឃាត ឈានដល់ការតាមសម្លាប់ផ្តាច់ពូជ ដោយអារកសម្លាប់ប្រពន្ធដេលកំពុងមានផ្ទៃពោះ ម្តាយក្មេក ប្អូនថ្លៃ និងក្មួយតូចៗ សរុប១០នាក់ បន្ទាប់មកបានប្រមូលសពដាក់គរគ្នាក្នុងផ្ទះចាំចម្ការ ហើយចាក់សាំងដុតទាំងផ្ទះ និងសព បំណងបំបាត់ភ័ស្តុតាង។
ជនដៃដល់ជាឃាតករ មានឈ្មោះសុបិន មិនា អាយុ២០ឆ្នាំ មានលំនៅ ភូមិគីឡូ១០ ឃុំអារក្សត្នោត ស្រុកស្ទឹង ត្រង់។ ឃាតករនេះ បានកាប់ចាក់ អារកសម្លាប់ និងដុតសម្លាប់ប្រពន្ធ ម្តាយក្មេក និងក្មួយៗ ដែលត្រូវជាសាច់ ថ្លៃ សរុបចំនួន១០នាក់ រួមមាន ទី១-ឈ្មោះស៊ុន ស្រឿន ភេទស្រី អាយុ៦៧ រស់នៅទួលសំបួរ ឃុំទួលសំបួរ ស្រុកស្ទឹងត្រង់ ខេត្តកំពង់ចាម (ត្រូវជាម្តាយក្មេកជនសង្ស័យ)។ ទី២-ឈ្មោះ ធា តាំងលី ភេទស្រី អាយុ២០ឆ្នាំ កំពុងមានផ្ទៃពោះ (ត្រូវជាប្រពន្ធរបស់ជនសង្ស័យ)។ ទី៣-ឈ្មោះ ស៊ីម វិសាល ភេទស្រី អាយុ១៤ (ត្រូវជាក្មួយ)។ ទី៤-ឈ្មោះ ផា បូតា ភេទប្រុស អាយុ១៣ឆ្នាំ (ត្រូវជាក្មួយ)។ ទី៥-ឈ្មោះ ផា ស្រីតាន ភេទស្រី អាយុ១១ឆ្នាំ (ត្រូវជាក្មួយ)។ ទី៦-ឈ្មោះ ធា ថាក់ ភេទប្រុស អាយុ៧ឆ្នាំ (ត្រូវជាក្មួយ)។ ទី៧-ឈ្មោះ ផា សុភ័ក្ត្រ ភេទប្រុស អាយុ៧ឆ្នាំ (ត្រូវជាក្មួយ)។ ទី៨-ឈ្មោះ ផា សម្ភស្ស ភេទស្រី អាយុ៥ឆ្នាំ (ត្រូវជាក្មួយ)។ ទី៩-ឈ្មោះ ណាត នាង ភេទស្រី អាយុ២១ឆ្នាំ (ត្រូវជាបងថ្លៃ)។ សរុបទាំងកូនក្នុងផ្ទៃរបស់ស្ត្រីជាប្រពន្ធជនសង្ស័យផងនោះ អ្នកស្លាប់ មានចំនួន ១០នាក់។
លោក វ៉ា ស្រេង មេឃុំទួលសំបួរ បានបញ្ជាក់ប្រាប់ឱ្យថា ដើមហេតុដំបូង ស្ត្រីរងគ្រោះជាប្រពន្ធ និងជនដៃដល់ជាប្តី បានឈ្លោះប្រកែកគ្នា ធ្វើឱ្យស្ត្រីជាប្រពន្ធ បានរត់មកស្នាក់នៅផ្ទះម្តាយរបស់ខ្លួន ស្ថិតក្នុងភូមិពោន ឃុំទួលសំបួរ ស្រុកស្ទឹងត្រង់ (ទីតាំងកើតហេតុ) ដែលមានចម្ងាយប្រមាណជាង ៥គីឡូម៉ែត្រ ពីផ្ទះរបស់ខ្លួន ជាហេតុធ្វើឱ្យជនដៃដល់ជាប្តី ខឹងសម្បានឹងប្រពន្ធ ក៏ជិះម៉ូតូមកតាមរករឿងប្រពន្ធ ដល់ផ្ទះម្តាយក្មេក ដែលស្ថិតនៅភូមិពោន ដោយជនដៃដល់ បានប្រព្រឹត្តនូវអំពើឃាតកម្មដ៏សាហាវ ដោយអារកសម្លាប់ប្រពន្ធ ម្តាយក្មេក និងក្មួយៗនៅផ្ទះនោះទាំងអស់ សរុប១០នាក់ (រាប់ទាំងកូនក្នុងផ្ទៃរបស់ស្ត្រីជាប្រពន្ធ) បន្ទាប់មក បានលើកសពគរគ្នា រួចចាក់សាំងដុតចោល ដើម្បីបំបាត់ភ័ស្តុតាងតែម្តង។
លោកមេឃុំ បានបន្តថា សូម្បីតែក្មួយដែលរត់មកក្រៅផ្ទះ ក៏ត្រូវបានជនកំណាចនេះ តាមចាប់អារកសម្លាប់ផ្តាច់ពូជ និងយកសពមកដុតចោលផងដែរ។ ក្រោយពីសម្លាប់ប្រពន្ធ និងម្តាយក្មេក ព្រមទាំងសមាជិកក្រុមគ្រួសារសាច់ថ្លៃច្រើននាក់បែបនេះហើយ ជនដៃដល់ជាឃាតករ បានជិះម៉ូតូគេចមកផ្ទះរបស់ខ្លួនវិញ និងព្យាយាមរត់គេចខ្លួន តែត្រូវបានកម្លាំងសមត្ថកិច្ចតាមចាប់បានមកវិញ។
ដោយឡែក យោងតាមសេចក្តីប្រកាសព័ត៌មានរបស់រដ្ឋបាលខេត្តកំពង់ចាម បានបញ្ជាក់ថា ហេតុការណ៍ឃាតកម្ម អារក និងដុតផ្ទះសម្លាប់ខាងលើនេះ កើតឡើងនៅវេលាម៉ោង៥និង៣០ទៀបភ្លឺ ថ្ងៃទី២៣ ខែវិច្ឆិកា ឆ្នាំ២០២៥ ពោលគឺប្រមាណ ៣០នាទី មុនសមត្ថកិច្ចទទួលបានព័ត៌មាន។ ទីតាំងផ្ទះកើតហេតុ គឺស្ថិតក្នុងដីចម្ការ ដាច់ស្រយាល។ ករណីនេះ បណ្តាលឱ្យមនុស្ស ៩នាក់ បាត់បង់ជីវិត ក្នុងនោះ ៨នាក់ បាត់បង់ជីវិតក្នុងភ្នក់ភ្លើងផ្ទះឆេះ និងម្នាក់ទៀតត្រូវបានអារកសម្លាប់នៅចម្ងាយប្រហែល ១០០ម៉ែត្រ ពីទីតាំងផ្ទះឆេះ។ ជនរងគ្រោះ ទាំង៩នាក់ មានស្រី ៧នាក់ និងប្រុស ២នាក់ សុទ្ធតែជាសាច់ញាតិ។ ដោយឡែក ជនសង្ស័យជាឃាតករ ឈ្មោះសុបិន មិនា ត្រូវជាប្តីរបស់ជនរងគ្រោះម្នាក់ ត្រូវបានឃាត់ខ្លួន នៅវេលាម៉ោង ៩និង៣០នាទីព្រឹក ថ្ងៃទី២៣ ខែ វិច្ឆិកា ឆ្នាំ២០២៥ នៅចំណុចអូរហោះ ភូមិគីឡូ១០ ឃុំអារក្សត្នោត ស្រុកស្ទឹងត្រង់ ខេត្តកំពង់ចាម ដែលជាស្រុករបស់ជនសង្ស័យ ហើយជនសង្ស័យ បានសារភាពនូវឃាតកម្មរបស់ខ្លួនរួចហើយ។ នៅពេលសមត្ថកិច្ចឃាត់ ខ្លួន ជនសង្ស័យ ហាក់មានស្មារតីមិនប្រក្រតី។ តាមការពិនិត្យទឹកមូត្រ ជនសង្ស័យ ពុំត្រូវបានរកឃើញថាមានពាក់ព័ន្ធនឹងសារធាតុញៀនឡើយ។
ជាការសន្និដ្ឋានបឋម ជនសង្ស័យ និងក្រុមជនរងគ្រោះ គឺជាសាច់ញាតិនឹងគ្នា ដូច្នេះបញ្ហាឃាតកម្មនេះ គឺជាបញ្ហាផ្ទៃក្នុងគ្រួសារ។ ចំពោះមូលហេតុដែលនាំទៅដល់ការបង្កើតឱ្យមានឃាតកម្មនេះ គឺជនសង្ស័យបានសារ ភាពថា ខ្លួនមានការគុំកួនប្រពន្ធ ដែលតែងតែមានជម្លោះគ្នាជាប្រចាំ រហូតដល់ខ្លួនបានសម្រេចចិត្តសម្លាប់ប្រ ពន្ធ ម្តាយក្មេក បងថ្លៃ និងក្មួយៗ សរុបទាំងអស់ ៩នាក់៕