ក្រោយពេលដែលក្លឹប Man Utd បណ្តេញចេញពីតំណែងកាលពីថ្ងៃអង្គារ ទី១៨ ខែធ្នូ ឆ្នាំ ២០១៨ លោក Jose Morinho បានទូទាត់ថ្លៃចំណាយស្នាក់ជាមួយសណ្ឋាគារដោយអស់ទឹកប្រាក់ចំនួនជាង៦៧ម៉ឺនដុល្លារ ក្នុងរយៈពេល៨៩៥ថ្ងៃ។
នេះបើយោងតាមប្រភពពី Daily Mail ចេញផ្សាយថ្ងៃពុធ ទី១៩ ខែធ្នូ ឆ្នាំ២០១៨។
ក្នុងការមកដឹកនាំក្លឹប Man Utd អស់រយៈពេល២ឆ្នាំកន្លះ លោក Jose Morinho បានជួលបន្ទប់សណ្ឋាគារ Lowry Hotel ស្នាក់នៅកាលពីថ្ងៃ ទី០៦ ខែកក្កដា ឆ្នាំ២០១៦។
បើទោះជាលោក Morinho បានចុះកុងត្រារយៈពេលវែងជាមួយក្លឹប Man Utd ក៏ដោយ តែគាត់សម្រេចចិត្តស្នាក់នៅក្នុងសណ្ឋាគារ ជាជាងទិញផ្ទះរស់នៅផ្ទាល់ខ្លួន ដូចគ្រូបង្វឹកដទៃទៀត។
អតីតគ្រូបង្វឹកក្លឹបបិសាចក្រហម Man Utd ដែលត្រូវបានគេបណ្តេញចេញក្រោយពីប្រកួតចាញ់ហង្សក្រហម Liverpool ៣-១ កាលពីរាត្រីថ្ងៃអាទិត្យ បានជួលបន្ទប់១ នៅក្នុងសណ្ឋាគារលំដាប់ផ្កាយ៥ ជាប់មាត់ទន្លេ។
នៅក្នុងសណ្ឋាគារលំដាប់ផ្កាយ៥នេះ ក្នុង១ជាន់មានបន្ទប់ដូចលោក Morinho ស្នាក់នៅតែ១គត់។ បន្ទប់នេះមានលក្ខណៈពិសេស អាចអង្គុយមើលទេសភាពមាត់ទន្លេ មានទ្វារចេញចូល២ កន្លែងប្រជុំ និងកន្លែងទទួលភ្ញៀវធំទូលាយ ហើយឧបករណ៍ដែលបំពាក់នៅក្នុងបន្ទប់នោះ មានលក្ខណៈពិសេស។
ក្រុមគ្រួសាររបស់លោក Morinho នៅតែបន្តរស់នៅទីក្រុងឡុងដ៍ ដែលកូនស្រីរបស់គាត់បានបញ្ចប់ការសិក្សាមហាវិទ្យាល័យវិចិត្រសិល្បៈ និងកូនប្រុសលេងឱ្យក្លឹបបាល់ទាត់ Fulham កាលពីឆ្នាំ២០១៧៕