ទីបំផុត អ្នកប្រដាល់ជើងខ្លាំងរបស់អាមេរិក Floyd Mayweather បានប្រើពេលត្រឹមតែជាង២នាទីប៉ុណ្ណោះ ក្នុងទឹកទី១ ផ្ដួលដៃគូប្រកួតរបស់ខ្លួន TYenshin Nasukawa ជនជាតិជប៉ុន ដោយប្រើកណ្ដាប់ដៃពោរពេញដោយទម្ងន់ កាលពីយប់ឆ្លងឆ្នាំ នៅប្រទេសជប៉ុន។ នេះបើយោងតាមប្រភពព័ត៌មាន BBC ចេញផ្សាយកាលពីថ្ងៃអង្គារ ទី១ ខែមករា ឆ្នាំ២០១៩។
ប្រភពព័ត៌មានដដែលនោះ បានឲ្យដឹងទៀតថា Floyd រកបានលុយជាង៩លានដុល្លារ ។
Floyd ដើរចូលវាយដោយគ្មានញញើត និងវាយចេញជាបន្តបន្ទាប់ ទៅលើកីឡាករជប៉ុន ដោយសារតែគេមើលឃើញថា កីឡាកររូបនេះគ្មានសមត្ថភាពតទល់ជាមួយខ្លួននោះទេ។
កីឡាករជប៉ុន បានវាយតបតមកកាន់អ្នកប្រដាល់មិនដែលចាញ់របស់អាមេរិក តែមិនចំគោលដៅនោះទេ ផ្ទុយទៅវិញ Floyd វាយចូលចំៗគោលដៅ និងបានវាយធ្វើឲ្យកីឡាករ Tyenshin រាប់៣លើក ក្នុងរយៈពេល១៤០វិនាទី ទីបំផុត ម្ចាស់ផ្ទះសុំចុះចាញ់តែម្តង។ ការប្រកួតនេះត្រូវបានគេគម្រោងឲ្យវាយ៣ទឹក ដោយមួយទឹកៗ មាន៣នាទី។
គួររំលឹកថា អ្នកប្រដាល់ម្ចាស់ផ្ទះ TYenshin Nasukawa មានវ័យ២១ឆ្នាំ ក៏ជាជើងខ្លាំងមួយរូបដែររបស់ជប៉ុន ពោលគឺមិនដែលចាញ់ក្នុងចំណោម៣២ លើករបស់គេ កន្លងមក។ ចំណែកអ្នកប្រដាល់អាមេរិក Floyd Mayweather ធ្លាប់ប្រកួត៥០លើក គឺមិនដែលចាញ់ទាល់តែសោះ៕