បុរសម្នាក់ដែលជាមន្ត្រីបម្រើការនៅអគ្គនាយកមជ្ឈមណ្ឌលកម្ចាត់មីនកម្ពុជា (ស៊ីម៉ាក) ត្រូវបានក្រុមគ្រូពេទ្ត ខណៈដែលលោកបានរងរបួសធ្ងន់ធ្ងរ នៅពេលលោកបានប្រើប្រាស់ទូរស័ព្ទបណ្ដើរ កំពុងសាកថ្មបណ្ដើរ ដោយប្រើឆ្នាំងសាកដែលគ្មានគុណភាព តម្លៃ២៥០០រៀល ហើយត្រូវបានបញ្ជូនទៅសង្គ្រោះនៅមន្ទីរពេទ្យយោធភូមិភាគ៥ (ព២) ហេតុការណ៍បានកើតឡើងកាលពីវេលាម៉ោង១០ព្រឹក ថ្ងៃទី២២ ខែកុម្ភៈ ឆ្នាំ២០១៩ ស្ថិតនៅផ្ទះជួលមួយកន្លែង ក្រុមទី៤ ភូមិកម្មករ សង្កាត់ស្វាយប៉ោ ក្រុងបាត់ដំបង ខេត្តបាត់ដំបង។
មន្ត្រីដែលរងរបួសក្នុងហេតុការណ៍ផ្ទុះទូរស័ព្ទនេះ មានឈ្មោះសោម សុជាតិ ប្រធានគំរោងបោសសំអាតមីន និងជួយសង្គ្រោះជនពិការដោយសារមីន នៅខេត្តបាត់ដំបង។
តាមប្រភពព័ត)មានបានឲ្យដឹងថា មុនពេលកើតហេតុ គេបានឃើញលោកសោម សុជាតិ កំពុងលេងទូរស័ព្ទ ពេលដែកកំពុងសាកថ្ម ស្រាប់តែឮសំឡេងផ្ទុះ ក៏នាំគ្នាទៅមើលឃើញជនរងគ្រោះបានរងរបួសធ្ងន់ ចំដៃខាងឆ្វេង ឈាមហូរស្រោច គួរឲ្យរន្ធត់។ ពេលនោះ ក្រុមការងារនិងប្រជាពលរដ្ឋបានលើកជនរងគ្រោះនាំទៅកាន់មន្ទីរពេទ្យភ្លាមៗផងដែរ។
ប្រភពបានឲ្យដឹងថា ពេលទៅដល់មន្ទីរពេទ្យ ដោយមានសភាធ្ងន់ធ្ងរពេក ក្រុមគ្រូពេទ្យបានសម្រេចកាត់ដៃម្ខាង គឺប្រអប់ដៃធ្វេង (ដល់កដៃ) ដើម្បីព្យាបាលជនរងគ្រោះឲ្យរួចផុតពីអាយុជីវិត។
លោកប៉ាង ហៀង អធិការនគរបាលក្រុងបាត់ដំបង ប្រាប់ឱ្យដឹងថា នៅក្រុងបាត់ដំបង ពិតជាកើតឡើងនូវហេតុការណ៍នោះមែនទៅលើមន្រ្តីដោះមីនម្នាក់នៅអង្គភាពស៊ីម៉ាក បានជួលផ្ទះគេស្នាក់នៅដែល ម្ចាស់ផ្ទះមានឈ្មោះ ពេជ្រ ស្រីនិត។
លោកអធិការប្រាប់ឱ្យដឹងទៀតថា ហេតុការណ៍នេះវាកើតឡើងដោយខ្លួនឯង ខណៈដែលជនរងគ្រោះយកឆ្នាំងសាកទូរស័ព្ទទៅដោតព្រីភ្លើង ក៏បណ្តាលឱ្យផ្ទុះឆ្នាំងសាកទូរស័ព្ទនោះតែម្តង បណ្តាលឱ្យការដាច់ប្រអប់ដៃឆ្វេងភ្លាមៗ។ ជនរងគ្រោះបច្ចុប្បន្នកំពុងស្ថិតនៅសម្រាកព្យាបាលនៅមន្ទីរពេទ្យយោធានយោធភូមិភាគ៥ (ព២)។
ដោយឡែក ក្នុងទំព័រហ្វេសប៊ុកផ្លូវការ របស់ឯកឧត្តម ហេង រតនា អគ្គនាយកមជ្ឈមណ្ឌលកម្ចាត់មីនកម្ពុជា (ស៊ីម៉ាក) ក៏បានបង្ហោះសារសោកស្តាយ ចំពោះហេតុការណ៍ដ៏រន្ធត់នេះថា “សូមសំដែងនូវការសោកស្តាយចំពោះ លោកសោម សុជាតិ ដែលជាប្រធានគំរោងបោសសំអាតមីន និងជួយសង្គ្រោះជនពិការដោយសារមីននៅខេត្តបាត់ដំបង ដែលត្រូវរងរបួសពិការប្រអប់ដៃធ្វេង (ដល់កដៃ) ដោយសារការផ្ទុះឌុយសាកទូរសព្ទ័ ជាទូរសព្ទ័ប្រភេទIPhone។ នេះគឺរឿងមិនគួរឲ្យជឿទាល់តែសោះ ព្រោះកម្លាំងផ្ទុះខ្លាំង ទើបកំទេចប្រអប់ដៃទាំងមូល របួសខ្លួន និងកផងដែរ”៕
