តារាសម្ដែងអ្នកនាងភិន សុដាលីស បានបង្ហាញអារម្មណ៍រីករាយដែលបានចូលរួមមហោស្រពភាពយន្ដលើកទី៦ ដែលមានឈ្មោះថា “Silk Road Film Festival” ដែលធ្វើនៅខេត្តសៀងមិញ ប្រទេសចិន ហើយនាងនិងប្រតិភូមហាហង្ស បានមកដល់កម្ពុជាវិញ កាលពីល្ងាចថ្ងៃទី២១ ខែតុលា។
អ្នកនាងភិន សុដាលីស បានឲ្យដឹងថា នាងនិងប្រតិភូមហាហង្ស ត្រូវបានទទួលការការស្វាគមន៍យ៉ាងកក់ក្ដៅពីអ្នករៀបចំកម្មវិធីជូនទៅមក មើលស្ដង់ពិព័រណ៌រឿង ”ណូលី ណូឡា” ដែលមហាហង្សទទួលបានសិទ្ធិតាំងបង្ហាញ ហើយជាការលើកមុខលើកមាត់ភាពយន្ដខ្មែរនៅលើឆាកអន្ដរជាតិបានមួយផ្នែកផងដែរ បើទោះជានាងមិនបានទទួលរង្វាន់ជាផ្លូវការណាមួយក៏ដោយ ប៉ុន្តែនេះជាការផ្សព្វផ្សាយភាពយន្ដខ្មែរដើម្បីឲ្យបរទេសបានទទួលស្គាល់ពីស្នាដៃខ្មែរដែរ។
នាងបន្តថា ប្រតិភូមហាហង្ស លោកភឹម តារាវិបុល និងលោកអ៊ិន សុភិន ត្រូវបានទូរទស្សន៍ និងអ្នកកាសែតចិន សម្ភាសន៍ផងដែរ ដែលនេះជាឱកាសដែលយើងបានផ្សព្វផ្សាយកុនខ្មែរនៅបរទេស ហើយនាងពិតជាមានអារម្មណ៍រំភើបចិត្តខ្លាំងណាស់។
ដោយឡែក លោកអ៊ិន សុភិន ចាងហ្វាងផលិតកម្មមហាហង្ស បានបន្ថែមថា ទោះជាយើងមិនបានទទួលពានភាពយន្ដឆ្នើមប្រចាំមហោស្រពមែន ប៉ុន្ដែយើងទទួលបានការសរសើរច្រើនពីសំណាក់ទស្សនិកជន គណៈកម្មការ និងភ្ញៀវកិត្តិយសទាំងអស់ដែលចូលចូលរួមមហោស្រពនៅប្រទេសចិន នេះដោយសារតែរឿង ”ណូលី ណូឡា” បញ្ជាក់ពីតថភាពពីសង្គមខ្មែរបានច្រើនហើយពាក់ព័ន្ធតួសម្ដែងនិងបច្ចេកទេសថតវិញយើងមានស្ដង់ដាអន្ដរជាតិមួយដែលគេអាចទទួលយកបាន។
រឿង ”ណូលី ណូឡា” បញ្ចាំង២ដង គឺនៅថ្ងៃទី១៥និង១៩ខែតុលា រាល់ការបញ្ចាំងម្ដងៗ គឺទស្សនិកជនចូលមើលពេញៗ គឺការគាំទ្រកុនខ្មែរច្រើន ធ្វើឲ្យគេចាប់អារម្មណ៍កុនខ្មែរ ហួសពីការរំពឹងទុក ព្រោះគេមកមើលពេញៗសាល ហើយពេលទស្សនាចប់ពួកគាត់សុំថតរូប សុំចុះហត្ថលេខាជាមួយតារានិងប្រតិភូយើង ហើយអ្នកកាសែតចិនសុំសម្ភាសន៍ច្រើនមែនទែន ដែលធ្វើឲ្យយើងមានមោទនភាពចំពោះភាពយន្ដខ្មែរនៅលើឆាកអន្ដរជាតិនេះ។
គួរបញ្ជាក់ថា លោកអ៊ិន សុភិន បានដឹកនាំប្រតិភូមហាហង្ស ឡើងយន្ដហោះទៅចិន កាលពីថ្ងៃទី១៤ ខែតុលា ខណៈដែលកម្មវិធី “Silk Road Film Festival”បានបើកនៅថ្ងៃទី១៥និងបិទនៅថ្ងៃទី២០ខែតុលាទើបលោកបានដឹកនាំប្រតិភូមហាហង្សមកដល់ស្រុកវិញកាលពីល្ងាចថ្ងៃទី២១ ខែតុលា ឆ្នាំ២០១៩៕
