តារាសម្ដែងនិងជាពិធីការិនី ណូម័រ បានសារភាពថា ចំណងស្នេហានាងជាមួយ VJ សុភា គឺពិតជាបានដើរដល់ទីបញ្ចប់មែន ក្រោយរៀបការបានត្រឹមតែជិត៤ខែនេះ។ ប៉ុន្ដែមូលហេតុលម្អិតនៃការចែកផ្លូវគ្នានេះ មិនត្រូវបានណូម័រ ប្រាប់លម្អិតឡើយ ដោយនាងគ្រាន់តែអះអាងថា ”រស់នៅមិនចុះសម្រុងគ្នា” ប៉ុណ្ណោះ។
ណូម័រ ដែលមានឈ្មោះដើមថា អន រ៉ាស៊ីសុមេត្តា នោះ និយាយទាំងស្រងូតស្រងាត់នៅថ្ងៃទី១ ខែវិច្ឆិកា ថា ”ខ្ញុំនិងគាត់ (សុភា) បានព្រមព្រៀងគ្នាលែងលះគ្នាមែន គឺពួកយើងបានផ្ដិតមេដៃនៅចំពោះមុខអាជ្ញាធរអស់ហើយតាំងពីថ្ងៃទី២៨ ខែតុលាម្ល៉េះ ហើយពេលនេះល្ងាចទៅហើយគេអត់ធ្វើការអីចឹង រង់ចាំដល់ថ្ងៃច័ន្ទទី៤ វិច្ឆិកា ទើបពួកយើងចូលសាលាដំបូងរាជធានីភ្នំពេញម្ដងទៀត។
ណូម័រ បន្តថា ការចូលតុលាការហ្នឹង គ្មានអ្វីប្រែប្រួលទេ ព្រោះយើងបានសម្រេចចិត្តអស់ទៅហើយ អីចឹងគ្រាន់តែចូលសម្រេចចុងក្រោយហ្នឹង ព្រោះពួកខ្ញុំរៀបការហើយមានអេតាស៊ីវិលអីចឹងលែងគ្នាក៏ត្រូវធ្វើតាមផ្លូវច្បាប់ដែរ”។
ណូម័រ បានដឹកដៃ VJ សុភា រៀបការកាលពីថ្ងៃទី២៨ ខែឧសភា ឆ្នាំ២០១៩ នៅមជ្ឈមណ្ឌល Capital សែនសុខ រាជធានីភ្នំពេញ ក្រោយពីពួកគេស្វែងយល់ចិត្តគ្នាជាច្រើនឆ្នាំ។
ប៉ុន្ដែឥឡូវគូស្នេហ៍ដែលស្រលាញ់គ្នាចាក់ទឹកមិនលិចនេះ បានចែកផ្លូវគ្នាកណ្ដាលទីទៅវិញ ធ្វើឲ្យណូម័រ ស្រងូតស្រងាត់ជាខ្លាំង ហើយនាងតាំងចិត្តថា នឹងវិលមកចូលសិល្បៈវិញ ដោយតាំងចិត្តថា ចាប់ផ្ដើមជីវិតនៅលីវសាជាថ្មីចាប់ពីពេលនេះតទៅ។
ណូម័រ បញ្ជាក់ថា ”ខ្ញុំលែងគ្នាហ្នឹង ខ្ញុំអត់មានកូនទេ។ ចំណែកផ្ទះដែលពួកយើងថាទិញចូលគ្នានោះបានមកលើខ្ញុំ ព្រោះផ្ទះនោះជាលុយរបស់ខ្ញុំទាំងអស់។ ខ្ញុំមិនចង់និយាយថាលែងគ្នាហ្នឹងមកពីខាងណាទេ ព្រោះពួកយើងរស់នៅមិនចុះសម្រុងគ្នាគឺមានតែចែកផ្លូវគ្នា។ ពួកយើងព្រមព្រៀងគ្នាថាបញ្ចប់ត្រឹមនេះ ចាប់ពីពេលនេះតទៅ គឺជីវិតខ្ញុំនៅលីវម្ដងទៀត ហើយខ្ញុំនឹងវិលមកចូលសិល្បៈវិញនៅពេលខាងមុខនេះ”៕
