តារាចម្រៀងដា អារីយ៉ា ដែលមានឈ្មោះដើមថា ថុន ស្រីយ៉ា ត្រូវបានគេបង្ហើបថា នាងជាគូស្នេហ៍គ្នាជាច្រើនឆ្នាំមកហើយ របស់តារាចម្រៀងង៉ូត សិលា ដោយអ្នកទាំងពីរថែមទាំងរស់នៅផ្ទះក្រោមដំបូលតែមួយទៀតផង។
ព័ត៌មានបានឲ្យដឹងថា អារីយ៉ា ត្រូវបានអ្នកចម្រៀងសំឡេងខ្លាំងសិលា ប្រចណ្ឌខ្លាំងណាស់ ពិសេសហាមមិនឲ្យស្រីយ៉ា ស្និទ្ធស្នាលជាមួយតារាចម្រៀងណាផ្សេងឡើយអំឡុងដែលពួកគេច្រៀងជាមួយគ្នានៅ Happy Palace។
ប៉ុន្ដែក្នុងជំនួបកាលពីពេលថ្មីៗនេះ ស្រីស្រស់ដា អារីយ៉ា បែរជាប្រកែកញ៉ាញរឿងស្នេហ៍អតីតបេក្ខភាព X Factor Cambodia ដែលធ្លាក់ក្រោមស្នាដៃខេមរៈ សិរីមន្ដ នេះទៅវិញ។
អារីយ៉ា ថា ពិតជាមានគេច្រឡំច្រើនមែនថា នាងនិងលោកសិលា ជាសង្សារនឹងគ្នា រហូតមានអ្នកខ្លះថា រស់នៅផ្ទះជាមួយគ្នាទៀតផង។ ប៉ុន្តែតាមពិត នាងនិងលោកសិលា ត្រូវជាបងប្អូនជីដូនមួយជាមួយគ្នា មិនមែនគូស្នេហ៍ទេ។
ងារីយ៉ា បន្តថា ការរស់នៅផ្ទះជាមួយគ្នា គឺពិតប្រាកដមែន ព្រោះថាបងប្អូនជីដូនមួយទៅហើយ អីចឹងមានរឿងអីនៅជាមួយគ្នាមិនបាន ព្រោះផ្ទះហ្នុងមានឪពុកម្ដាយនាងនៅជុំគ្នាដែរតើ។ នាងថា បើមិនជឿទេ គេអាចតាមដានបាន ព្រោះថានាងមិនដែលផុសរូបអ្វីជាមួយសិលា បែបជាគូស្នេហ៍ឡើយ។
ដា អារីយ៉ា ជាអតីតបេក្ខភាព X Factor Cambodia រដូវកាលទី១ តែបានបរាជ័យព្រោះមិនអាចយកឈ្នះចាន់ សុបញ្ញា បានឡើយ។ នាងក៏ធ្លាប់ប្រលងចម្រៀងក្នុងកម្មវិធី “ពេជ្រកំពុងច្នៃ” របស់ទូរទស្សន៍អាស៊ីអាគ្នេយ៍ និង “Cambodian Idol” រដូវកាលទី១ផងដែរ តែគ្មានឱកាសលើកពានឡើយ។
ទោះជាយ៉ាងណា ដា អារីយ៉ា បន្ថែមថា បទពិសោធន៍ក្នុងអាជីពសិល្បៈជាង៣ឆ្នាំនេះ ធ្វើឲ្យនាងអាចចាប់អាជីពចម្រៀងបានតទៅមុខទៀតហើយពេលនេះមានបណ្ដាស្ថានីយទូរទស្សន៍ និងកម្មវិធីផ្សេងៗ ហៅនាងច្រៀងជាបន្ដបន្ទាប់ផងដែរ។ នាងថា ពេលនេះនាងមានអាយុ២៧ឆ្នាំហើយ តែនាងមិនទាន់ចង់រៀបការឡើយ៕
