ខេត្តព្រះវិហារ ៖ ប្តីប្រពន្ធខុសវ័យ១គូ ប្រពន្ធផ្ទុះកំហឹង ក៏ស្ទុះទៅទាញប៊ីដុងសាំងចាក់ស្រោចម៉ូតូ នៅក្នុងផ្ទះ រួចកេះដែកកេះដុត ទាំងដែលខ្លួននិងប្តី រួមទាំង ម្តាយក្មេកកំពុងនៅក្នុងផ្ទះជុំគ្នា បណ្តាលឱ្យភ្លើងឆាបឆេះ រលាក២នាក់ប្តីប្រពន្ធយ៉ាងធ្ងន់ ចំណែកម្តាយក្មេករបួសស្រាល រីឯផ្ទះសម្បែង និងទ្រព្យសម្បត្តិ ត្រូវក្លាយជាផេះផង់ត្រឹមមួយប៉ព្រិចភ្នែក បង្កឱ្យការភ្ញាក់ផ្អើលឆោឡោឡើង កាលពីវេលាម៉ោង១០យប់ ថ្ងៃទី១៦ ខែកុម្ភៈ ឆ្នាំ២០១៩ នៅចំណុចភូមិកំពេញ ឃុំយាង ស្រុកជាំក្សាន្ត។
លំនៅដ្ឋានដែលទទួលរងការឆាបឆេះទាំងស្រុង មានទំហំ៧ម៉ែត្រ គុណនឹង៨ម៉ែត្រ ជាប្រភេទផ្ទះតៀម សង់ពីឈើ ជញ្ជាំងឈើ ប្រក់ស័ង្កសី។
ស្ត្រីដែលផ្ទុះភ្លើងប្រចណ្ឌប្តី រហូតដល់ដាច់ចិត្តចាក់សាំងដុតទាំងមនុស្សទាំងផ្ទះនេះ មានឈ្មោះគឹម ចិន្តា អាយុ៣៨ឆ្នាំ (រលាកយ៉ាង ធ្ងន់)។ ចំណែកបុរសជាប្តី មានឈ្មោះយ៉ែម សុខហៃ អាយុ២៤ឆ្នាំ (រលាកយ៉ាងធ្ងន់)។ ដោយឡែកស្ត្រីជាម្តាយក្មេក មានឈ្មោះគឹម សាន់ អាយុ ៦៦ឆ្នាំ (របួសស្រាល)។ អ្នកទាំង៣ស្នាក់នៅផ្ទះជុំគ្នា ក្នុងភូមិឃុំកើតហេតុខាងលើ។
ប្រភពពីកន្លែងកើតហេតុ បានឱ្យដឹងថា នៅមុនពេលកើតហេតុ កាលពីយប់ថ្ងៃទី១៦ ខែកុម្ភៈ ឆ្នាំ២០១៩ បុរសជាប្តីក្មេង បានសុំប្រពន្ធរបស់ខ្លួនទៅដើរលេង ប៉ុន្តែប្រពន្ធមិនព្រមឱ្យទៅ ព្រោះខ្លាចប្តីឆ្លៀតពេលទៅដឹកស្រីក្មេង ទើបធ្វើឱ្យកើតជាជម្លោះពាក្យសម្តីនឹងគ្នាយ៉ាងក្តៅគគុក រហូតដល់ស្ត្រីជាប្រពន្ធ ទ្រាំមិនបាន ក៏ស្ទុះទៅទាញប៊ីដុងសាំង ចាក់ស្រោចលើម៉ូតូ ដែលនៅក្នុងផ្ទះ ហើយក៏កេះដែកកេះ ដុតទាំងកំរោល ធ្វើឱ្យភ្លើងបានឆេះរាលពេញផ្ទះ និងឆេះទាំងខ្លួនឯង និងប្តី ព្រមទាំងម្តាយក្មេក ដែលកំពុងនៅផ្ទះជុំគ្នាទៀតផង ទីបំផុត ត្រឹមតែមួយប៉ព្រិចភ្នែកប៉ុណ្ណោះ ផ្ទះ១ខ្នង រួមនឹងទ្រព្យសម្បត្តិក្នុងផ្ទះ ត្រូវភ្លើងឆេះគ្មានសល់ ចំណែកជនរងគ្រោះទាំង៣នាក់ ត្រូវបានអ្នកភូមិជួយសង្គ្រោះចេញពីអណ្តាតភ្លើងទាន់ពេល គ្រាន់តែបង្កឱ្យទាំង២នាក់ប្តីប្រពន្ធ ត្រូវភ្លើងឆេះរលាករងរបួសធ្ងន់ ចំណែកស្ត្រីជាម្តាយក្មេករងរបួសស្រាល។
ក្រោយកើតហេតុ ជនរងគ្រោះទាំង២នាក់ប្តីប្រពន្ធដែលរងរបួសធ្ងន់ ត្រូវបានដឹកបញ្ជូនទៅសង្គ្រោះជីវិតនៅឯមន្ទីរពេទ្យបង្អែកខេត្តកំពងធំ។ ចំណែកស្ត្រីជាម្តាយក្មេក ដែលរងរបួសស្រាល ត្រូវបញ្ជូនទៅសង្ត្រោះព្យាបាលនៅមន្ទីរពេទ្យស្រុកកូលេន ខេត្តព្រះវិហារ៕