រតនគិរី ៖ ស្ត្រីជាប្រពន្ធម្នាក់បានតូចចិត្តជាខ្លាំង ព្រោះតែប្តីរបស់គាត់មានស្រីស្នេហ៍បញ្ឈឺចិត្តហើយ ហ៊ានយកស្រីស្នេហ៍នោះមកេកលើផ្ទះ មិនតែប៉ុណ្ណោះថែមទាំងថ្លើមធំគំរាមសម្លាប់គាត់ជាប្រពន្ធចោលទៀត។ ដោយសារតែខ្លាចការគំរាមរបស់ប្តី នាងបានសំណូមពរដល់អ្នកសារព័ត៌មានឲ្យជួយផ្សព្វផ្សាយជូនដំណឹងដល់អាជ្ញាធរមូលដ្ឋានផង។
ស្ត្រីដែលអះអាងថា ត្រូវប្តីគំរាមសម្លាប់នេះ មានឈ្មោះ ហម ហេង អាយុ៣៣ឆ្នាំ ជនជាតិខ្មែរ មានស្រុកកំណើតនៅភូមិពង្រ ឃុំពង្រ ស្រុកបារាយណ៍ ខេត្តកំពង់ធំ មានកូនស្រីម្នាក់ អាយុ១០ឆ្នាំ ក្នុងបន្ទប់។ ចំណែកបុរសជាប្តី មានឈ្មោះ មឿន ថា អាយុ៣២ឆ្នាំ ជនជាតិខ្មែរ ស្រុកកំណើតជាមួយគ្នា។ ពួកគាត់ទាំង២ បានធ្វើចំណាកស្រុក មករស់នៅខេត្តរតនគិរី រយៈពេលជាងមួយឆ្នាំទៅហើយ ដើម្បីបានរស់នៅជុំគ្នា។
ស្ត្រីតូចចិត្តនឹងប្តីនាំស្រីស្នេហ៍មកដេកលើផ្ទះហើយគំរាមសម្លាប់ បានប្រាប់ថា គាត់និងប្តីបានចាប់គ្នារៀបការជាប្តីប្រពនញធតាំងពីឆ្នាំ២០១១មកម្ល៉េះ ហើយក៏បាននាំចេញពីស្រុកកំណើតទៅធ្វើការនិងរស់នៅប្រទេសថៃ រហូតបង្កើតបានកកូនស្រីម្នាក់។ កន្លងមក ជីវិតប្តីប្រពន្ធរបស់ពួកគាត់មានសេចក្តីសុខណាស់ ដោយប្តីរបស់គាត់ចេះយកចិត្តទុកដាក់ ស្រលាញ់ប្រពន្ធកូន និងខិតខំធ្វើការមិនឲ្យគាត់ឃ្នើសចិត្តទេ។
គាត់បានបន្តទៀតថា លុះនៅរយៈពេលចុងក្រោយ ស្រាប់តែប្តីរបស់គាត់បានផ្លាស់ប្តូរចិត្ត លួចមានស្រីស្នេហ៍បញ្ឈឺចិត្តគាត់យ៉ាងខ្លាំង អ្វីដែលគាត់ឈឺចិត្តបំផុតនោះ ប្តីរបស់គាត់បាននាំស្រីស្នេហ៍នោះមកដេកផ្ទះ ហើយបានគំរាមសម្លាប់គាត់ជាប្រពន្ធចោលទៀត រហូតគាត់លែងហ៊ានដេកផ្ទះ ដើរសុំផ្ទះអ្នកជិតខាងដេក ព្រោះខ្លាចប្តីរបស់គាត់មកវាយធ្វើបាប។
គាត់បានបញ្ជាក់ថា ក្រោយពីប្តីគំរាមសម្លាប់បែបនេះ គាត់ក៏បានរត់ទៅប្តឹងអាជ្ញាធរភូមិឃុំ និងអង្គការស្ត្រីផងដែរ។ មកពេលនេះ មិនទាន់មានខាងណាហៅគាត់សួរនាំឡើយ ប៉ុន្តែបានហៅប្តីរបស់គាត់ចូលបំភ្លឺនៅប៉ុស្តិ៍ តែប្តីរបស់គាត់មិនបានចូលខ្លួនបំផ្លឺនោះទេ។
ជាចុងក្រោយ ស្ត្រីរងគ្រោះបានស្នើសុំដល់អាជ្ញាធរសូមចាត់វិធានការ ឬពន្លឿនការងារ ដើម្បីកុំឲ្យប្ដីរបស់គាត់មកគំរាម និងប្រើអំពើហិង្សាបន្តទៅទៀត ដោយឡែក គាត់ក៏បានសូមសំណូមពរដល់អ្នកសារព័ត៌មានជួយផ្សព្វផ្សាយជូនដំណឹង ដល់អាជ្ញាធរមូលដ្ឋាន ចាត់វិធានការទៅលើប្ដីរបស់គាត់ផងដែរ។
យ៉ាងណា អ្នកសារព័ត៌មានយើងរង់ចាំបកស្រាយពីភាគីខាងបុរសជាប្តី ដែលត្រូវស្ត្រីជាប្រពន្ធចោទប្រកាន់ដូចខាងលើជានិច្ច៕