តារាសម្តែងនិងពិធីការិនី ស្រីស្អាតជុំ រចនាពេជ្រ ហៅបេប៊ី បានចេញមុខឡើងឆាកតន្ត្រីផ្ទួនៗនៅសប្តាហ៍នេះ ដូចជាកាលពីថ្ងៃទី០៣ ខែសីហា ស្រីស្រស់ឡើងឆាកទូរទស្សន៍អាស៊ីអាគ្នេយ៍ ក្នុងកម្មវិធី “តន្ត្រី AD” ហើយថ្ងៃអាទិត្យ នាងឡើងឆាកទូរទស្សន៍ PNN កម្មវិធី “Anchor Fun Zone” ដោយលើកយកបទចម្រៀងថ្មីរបស់ខ្លួននៅផលិតកម្មថោន តាមរយៈបទ “baby Lonely”, “អត់សើច” និងបទ “Hey baby”។
បេប៊ី មានការតុបតែងខ្លួនកាន់តែប្លែកទៅៗ ហើយមានក្រុមរាំអមកញ្ជ្រោកលើឆាកតន្ត្រីដែលមិនចាញ់តារាល្បីផ្សេងៗទៀតឡើយ។
ពិធីការិនីទូរទស្សន៍ CTN រូបនេះថា មិនយូរទេ MV ជាពិសេសរបស់នាងនៅផលិតកម្មថោន នឹងបានចេញ នាងមានសង្ឃឹមថា ទស្សនិកជននឹងគាំទ្រជាមួយអាជីពថ្មីនេះដូចការសម្តែងនិងពិធីការិនីរបស់នាងនាពេលកន្លងមក។
ប៉ុន្តែនៅពេលត្រូវសួរថា តើបេប៊ី នៅទទួលការសម្តែងភាពយន្តនិងថត MV ឱ្យតារាផ្សេងទៀតឬអត់នោះ? ស្រីស្រស់រូបនេះនិយាយបែបស្ទាក់ស្ទើរ ដោយអះអាងថា ឱ្យតែអាជីពសិល្បៈនាងស្រលាញ់ទាំងអស់ ប៉ុន្តែពេលនេះត្រូវពង្រឹងអាជីពចម្រៀងសិន ហើយការថតសម្តែងផ្សេងៗទៀត គឺនាងធ្វើទៅតាមពេលវេលា។
បេប៊ី បានធ្វើបទចម្រៀងផ្ទាល់ខ្លួនមុនពេលដែលនាងមានឱកាសបានក្លាយជាតារាចម្រៀងអាជីពនៅផលិតកម្មថោន ដោយនាងល្បីបទ “អំណាចលុយ”។
ការមកដល់ផលិតកម្មថោន របស់បេប៊ី នៅពេលនេះធ្វើឱ្យស្រីស្អាតត្រូវបានមហាជនលើកឡើងថា នាងមានការប្រជែងគ្នាយ៉ាងស្វិតស្វាញជាមួយម្ចាស់បទ “លុយ លុយ លុយ” គឺកញ្ញារ៉ាប៊ី ដែលតារាទាំងពីរមានសម្រស់និងក្បាច់រាំមិនចាញ់គ្នាឡើយ។
ប៉ុន្តែបេប៊ី ថា រ៉ាប៊ី ជាមិត្តភក្តិរបស់នាង ហេតុនេះហើយគ្មានការប្រកួតប្រជែងគ្នាទេ គឺមានតែប្រឹងប្រែងរៀងៗខ្លួនប៉ុណ្ណោះ។ ដោយឡែករឿងស្នេហាវិញ បេប៊ី នៅតែមិនដែលហ៊ានបណ្តើរគូស្នេហ៍ដូចតារាដទៃទេ ស្របពេលដែលម្តាយរបស់នាង អ្នកស្រីប៊ុន ណារី ធ្លាប់និយាយថា កូនស្រីគាត់អត់ទាន់មានគូឡើយ ព្រោះ “អ្នកក្រមិនហ៊ាន អ្នកមានមិនចូល”៕
