ភ្នំពេញ ៖ ប្រធានាធិបតីសហរដ្ឋអាមេរិក លោកដូណាល់ ត្រាំ បានផ្ញើលិខិតជូនសម្ដេចហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា អរគុណចំពោះការស្នើរូបលោកសម្រាប់ពានរង្វាន់ណួបែលសន្តិភាព ។ ជាមួយគ្នានេះ លោកត្រាំ បានសរសើរសម្ដេចហ៊ុន ម៉ាណែត ជាមេដឹកនាំឆ្នើមខ្លាំង ដែលឲ្យតម្លៃជីវិតមនុស្ស និងស្រឡាញ់សន្តិភាព ។
លិខិតរបស់លោកដូណាល់ ត្រាំ ចុះថ្ងៃទី២០ ខែសីហា ឆ្នាំ២០២៥ ជូនសម្ដេចហ៊ុន ម៉ាណែត នាយករដ្ឋមន្រ្តី នៃព្រះរាជាណាចក្រកម្ពុជា មានខ្លឹមសារថា “ឯកឧត្ដមនាយករដ្ឋមន្រ្តី! ខ្ញុំសូមអរគុណចំពោះលិខិតដ៏កក់ក្ដៅរបស់ឯកឧត្ដម និងជាពិសេស ការស្នើរូបខ្ញុំ សម្រាប់ពានរង្វាន់ណូបែលសនិ្តភាព ។
ខ្ញុំក៏មានកិត្តិយសក្រៃលែង ដែលបានសន្ធនាជាមួយឯកឧត្ដម ដើម្បីរួមចំណែកបញ្ចប់ជម្លោះប្រដាប់អាវុធជាមួយប្រទេសថៃ ។ ប្រទេសកម្ពុជា មានប្រវត្តិសាស្រ្ត និងវប្បធម៌យូរអង្វែង និងសម្បូរបែប ។ ខ្ញុំជឿជាក់ថា ឯកឧត្ដម ជាថ្នាក់ដឹកនាំដ៏ឆ្នើមមួយរូប ដែលផ្ដល់តម្លៃលើជីវិតមនុស្ស និងស្រលាញ់សន្តិភាព ។ ខ្ញុំពិតជាមានមោទនភាពដែលបានចូលរួមជាផ្នែកមួយនៃកិច្ចព្រមព្រៀងបទឈប់បាញ់ ដែលបានបញ្ចប់នូវសោកនាដកម្មនៃជម្លោះប្រដាប់អាវុធ និងបានសង្រ្គោះជីវិតមនុស្សរាប់ពាន់នាក់ ។ ចាប់ពីពេលនេះតទៅ យើងអាចផ្ដោតការយកចិត្តទុកដាក់ជាមួយគ្នា លើការកសាងវិបុលភាព សម្រាប់ប្រជាជាតិដ៏អស្ចារ្យរបស់យើងទាំងពីរ“ ។
ឆ្លើយតបទៅនឹងលិខិតរបស់លោកដូណាល់ ត្រាំ ខាងលើនេះ សម្ដេចហ៊ុន ម៉ាណែត បានសរសេរនៅក្នុងទំព័របណ្ដាញសង្គម ហ្វេសប៊ុក របស់សម្ដេច នៅថ្ងៃទី២៧ ខែសីហា ឆ្នាំ២០២៥ ថា “លិខិតពីឯកឧត្តមប្រធានាធិបតីសហរដ្ឋអាមេរិក Donald J. Trump ។ ដូចបានបញ្ជាក់ក្នុងលិខិតរបស់ឯកឧត្តមប្រធានាធិបតី គឺការចូលរួមរបស់ឯកឧត្តម ដោយផ្ទាល់ ក្នុងការធ្វើឲ្យមានបទឈប់បាញ់ រវាងកងទ័ពកម្ពុជា និងកងទ័ពថៃ បានឆាប់រហ័ស គឺបានជួយសង្គ្រោះជីវិតមនុស្សជាច្រើននាក់“។
គួរបញ្ជាក់ថា ការសរសើររបស់លោកដូណាល់ ត្រាំ តាមរយៈលិខិតខាងលើនេះ បានធ្វើឡើងបន្ទាប់ពីលោកដូណាល់ ត្រាំ បានជួបសន្ទនាជាមួយសម្ដេចហ៊ុន ម៉ាណែត នាយករដ្ឋមន្រ្តីកម្ពុជា តាមទូរស័ព្ទ និងបានជួយសម្របសម្រួលឱ្យកម្ពុជា-ថៃ សម្រេចបានកិច្ចព្រមព្រៀងបទឈប់បាញ់ ក្នុងជម្លោះប្រដាប់អាវុធ ដែលថៃ ឈ្លានពានលើកម្ពុជា រយៈពេល៥ថ្ងៃ កាលពីចុងខែកក្កដា កន្លងទៅនេះ ។
ជាការកត់សម្គាល់ មុនចេញមកសរសើរសម្ដេចហ៊ុន ម៉ាណែត នាពេលនេះ ប្រធានាធិបតីអាមេរិក លោក ត្រាំ បានទាក់ទងតាមទូរស័ព្ទជាមួយសម្ដេចនាយករដ្ឋមន្រ្តីកម្ពុជា ចំនួន២លើក គឺលើកទី១ នៅថ្ងៃទី២៦ ខែកក្កដា ឆ្នាំ២០២៥ និងលើកទី២ នៅ២៨ ខែកក្កដា ឆ្នាំ២០២៥ ក្នុងពេលដែលថៃ កំពុងបើកការវាយប្រហារប្រដាប់អាវុធ មកលើកកម្ពុជា។ នៅក្នុងជំនួបតាមទូរស័ព្ទ លើកទី១ នៅថ្ងៃទី២៦ ខែកក្កដា លោកត្រាំ បានប្រាប់នាយករដ្ឋមន្ត្រីកម្ពុជាថា លោកមិនចង់ឃើញការកើតមានសង្គ្រាម ឬការប្រយុទ្ធគ្នា ដែលនាំឲ្យមនុស្សជាច្រើនស្លាប់និងរបួសទាំងសងខាង ដោយគិតទាំងកងទ័ព និងប្រជាជនស៊ីវិលឡើយ។ កាលណោះ ជាការឆ្លើយតប សម្ដេចហ៊ុន ម៉ាណែត ប្រាប់ទៅកាន់លោកត្រាំ វិញថា កម្ពុជា មិនចង់បន្តការប្រយុទ្ធ ឬបន្តធ្វើសង្គ្រាមឡើយ ហើយកម្ពុជា បានឯកភាពជាមួយសំណើឱ្យមានការឈប់បាញ់ភ្លាម និងដោយឥតលក្ខខណ្ឌ ជាមួយកងទ័ពថៃ ។
ជំនួបតាមទូរស័ព្ទរវាងលោកត្រាំ និងសម្ដេចហ៊ុន ម៉ាណែត ជាជំហានដ៏សំខាន់ នាំឱ្យមានការជួបប្រជុំរវាងនាយករដ្ឋមន្ត្រីកម្ពុជា និងនាយករដ្ឋមន្ត្រីស្ដីទីថៃ នៅលើទឹកដីម៉ាឡេស៊ី ក្រោមការសម្របសម្រួលរបស់នាយករដ្ឋមន្ត្រីម៉ាឡេស៊ី អាន់វ៉ា អ៊ីប្រាហ៊ីម ដែលជាប្រធានប្តូរវេនអាស៊ាន និងឈានទៅសម្រេចបានបទឈប់បាញ់មួយ ដែលចូលជាធរមាននៅម៉ោង ០០៖០០នាទី ថ្ងៃទី២៨ ខែកក្កដា ឆ្នាំ២០២៥ ហើយបន្តមកដល់បច្ចុប្បន្ន ។
មន្រ្តីរាជរដ្ឋាភិបាល បានចាត់ទុកការសរសើររបស់លោកដូណាល់ ត្រាំ មកលើនាយករដ្ឋមន្រ្តីកម្ពុជា ថាជាថ្នាក់ដឹកនាំឆ្នើមមួយរូប ឱ្យតម្លៃជីវិតមនុស្ស និងសន្តិភាព ដូចខាងលើនេះ គឺការជាបង្ហាញនូវភាពជឿជាក់របស់សហរដ្ឋអាមេរិក មកលើកម្ពុជា ។
លោកជុំ កុសល រដ្ឋលេខាធិការក្រសួងព័ត៌មាន និងជាទីប្រឹក្សាផ្ទាល់សម្ដេចនាយករដ្ឋមន្រ្តី បានលើកឡើងតាមបណ្ដាញសង្គម នៅថ្ងៃទី២៨ ខែសីហា ឆ្នាំ២០២៥ ថា “លោកប្រធានាធិបតីសហរដ្ឋអាមេរិក មានការជឿជាក់ និងបានចាត់ទុកសម្តេចមហាបវរធិបតីហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា ជាថ្នាក់ដឹកនាំដ៏ឆ្នើមមួយរូប ដែលផ្តល់តម្លៃលើជីវិតមនុស្ស និងស្រឡាញ់សន្តិភាព“ ។
ជាមួយគ្នានោះដែរ លោកបណ្ឌិត សូ ណារ៉ូ រដ្ឋមន្រ្តីប្រតិភូអមនាយករដ្ឋមន្រ្តី បានលើកឡើងតាមបណ្ដាញសង្គមថា “លោក ត្រាំ សរសើរសម្ដេចធិបតី ហ៊ុន ម៉ាណែត ជាមេដឹកនាំ “ខ្លាំង” ដែលឱ្យតម្លៃលើជីវិតមនុស្សជាតិ និងលើកតម្កើងសន្តិភាព“ ។
បន្ថែមលើសំណេរតាមបណ្តាញសង្គម ខាងលើ លោកបណ្ឌិត សូ ណារ៉ូ បានមានប្រសាសន៍ប្រាប់ “នគរធំ” នៅថ្ងៃទី២៨ ខែសីហា ឆ្នាំ២០២៥ ថា “បាទ! ការផ្ញើសារសរសើររបស់លោកប្រធានាធិបតីសហរដ្ឋអាមេរិក ដូណាល់ ត្រាំ ចំពោះសម្ដេចធិបតី ហ៊ុន ម៉ាណែត គឺចំពេលនៃខួប២ឆ្នាំ នៃការឡើងកាន់តំណែងរបស់សម្ដេចធិបតី ហ៊ុន ម៉ាណែត ហើយក៏ជាការគាប់ជួននៃការសរសើរនូវសមិទ្ធផលរបស់រដ្ឋាភិបាលថ្មី ក្នុងរយៈពេល២ឆ្នាំ ដែលសម្ដេចអគ្គមហាសេនាបតីតេជោ បានវាយតម្លៃ នាថ្ងៃទី២៣ ខែសីហា នេះថា ២ឆ្នាំគ្រប់គ្រាន់ដើម្បីវាយតម្លៃឃើញនៃសកម្មភាពរបស់រាជរដ្ឋាភិបាល គឺធ្វើបានល្អគ្រប់ផ្នែក ទាំងថ្នាក់ជាតិ និងថ្នាក់ក្រោមជាតិ ។ ដូច្នេះការវាយតម្លៃសរសើររបស់លោកប្រធានាធិបតីអាមេរិក ដូណាល់ ត្រាំ ក៏ដូចជាការវាយតម្លៃខ្ពស់របស់សម្ដេចអគ្គមហាសេនាបតីតេជោ ហ៊ុន សែន ចំពោះការដឹកនាំរបស់សម្ដេចធិបតី ក្នុងរយៈពេល២ឆ្នាំ ជានាយករដ្ឋមន្រ្តីនេះ គឺមានអត្ថន័យដ៏សំខាន់ ដែលកាន់តែពង្រឹងនូវជំនឿទុកចិត្តរបស់ប្រជាពលរដ្ឋ ទៅលើសមត្ថភាពដឹកនាំរបស់សម្ដេចធិបតី និយាយដោយឡែក និងថ្នាក់ដឹកនាំរាជរដ្ឋាភិបាល ដែលជាអ្នកបន្តវេន ហ្នឹងនិយាយជារួម ។ ដូច្នេះការសរសើរសម្ដេចធិបតី ជាមេដឹកនាំខ្លាំង របស់លោកត្រាំ ក៏ដូចជាការបំពេញភារកិច្ចដ៏ល្អ ដែលសម្ដេចតេជោ សរសើរនេះ មានតម្លៃណាស់ ចំពេលខួប២ឆ្នាំនៃការបម្រើរដ្ឋាភិបាល កាន់តែពង្រឹងទឹកចិត្ត ជំនឿរបស់ប្រជាជន ទៅលើការដឹកនាំរបស់រដ្ឋាភិបាលផង ក៏ដូចជាការពង្រឹងឆន្ទៈ ការប្ដេជ្ញាក្នុងការបន្តដឹកនាំប្រទេសជាតិ ទៅរកមាគ៌ាដ៏ត្រឹមត្រូវ នៃការការពារ រក្សាសន្តិភាព ក៏ដូចជាការអភិវឌ្ឍប្រទេសជាតិ ឲ្យបានចម្រើនជឿនលឿន ដូចចក្ខុវិស័យដែលរាជរដ្ឋាភិបាល បានដាក់ចេញសម្រាប់ឆ្នាំ២០៣០ និង២០៥០ ដែលប្រទេសកម្ពុជា ក្លាយទៅជាប្រទេសអ្នកមាន“ ។
លោកបណ្ឌិត សូ ណារ៉ូ បានមានប្រសាសន៍បន្តថា “ចំពោះការសរសើរសម្ដេចធិបតី របស់ដូណាល់ ត្រាំ ថាសម្ដេចធិបតី មិនមែនត្រឹមតែជាមេដឹកនាំខ្លាំងទេ ប៉ុន្តែឲ្យតម្លៃទៅលើជីវិតមនុស្ស និងសន្តិភាព យើងកាន់តែឆ្លុះបញ្ចាំងឲ្យឃើញថា គឺការដឹកនាំរបស់សម្ដេចធិបតី គឺជាការដឹកនាំមិនមែនតែប្រើបញ្ញាញាណទេ គឺប្រើទាំងបេះដូង ។ បេះដូង គិតដល់បញ្ហាជីវិតមនុស្ស គិតដល់សុខសុវត្ថិភាព ហើយប្រសាសន៍របស់សម្ដេច ក្នុងរយៈពេលឡើងកាន់អំណាច ២ឆ្នាំចុងក្រោយនេះ គឺសឹងតែរាល់ថ្ងៃរំលឹកអំពីតម្លៃនៃសន្តិភាព ។ ឥឡូវនេះយើងឆ្លងកាត់សង្រ្គាមបង្ហូរឈាម ៥ថ្ងៃនេះ ប្រជាជនកម្ពុជា កាន់តែយល់អំពីតម្លៃនៃសន្តិភាព ដែលសម្ដេចធិបតី លោកតែងតែរំលឹក តែងតែប្រាប់ឲ្យប្រជាពលរដ្ឋខិតខំការពារនៃតម្លៃសន្តិភាពនេះដោយតម្លៃណាក៏ដោយ ។ អ៊ីចឹងយើងឃើញថា អ្វីដែលតែងតែរំលឹកអំពីតម្លៃសន្តិភាព ហើយអ្វីដែលលោកអនុវត្តអត់ធ្មត់ក្នុងបទឈប់បាញ់ គឺដើម្បីថែរក្សាសន្តិភាព ការពារការបាត់បង់អាយុជីវិតរបស់ប្រជាពលរដ្ឋ មិនត្រឹមតែរបស់កម្ពុជា ទេ ទាំងអាយុជីវិតរបស់ភាគីថៃ ផង ។ ដូច្នេះវាមានអត្ថន័យថា លោកមិនត្រឹមតែជាមេដឹកនាំដ៏ខ្លាំងទេ លោកក៏ជាមេដឹកនាំដែលមានបេះដូងមនុស្សធម៌ មនុស្សជាតិ ហើយជានិច្ចជាកាលតម្កល់តម្លៃសនិ្តភាព គឺខ្ពស់ជាងអ្វីៗទាំងអស់“ ។
ជុំវិញការកត់សម្គាល់នេះដែរ គណបក្សនយោបាយសម្ព័ន្ធភាពជាមួយគណបក្សកាន់អំណាច (គណបក្សប្រជាជនកម្ពុជា) និងនៅក្នុងក្របខ័ណ្ឌក្រុមពិគ្រោះនិងផ្ដល់យោបល់ បានលើកឡើងថា ការដែលនាយករដ្ឋមន្រ្តីកម្ពុជា ទទួលបានការសរសើរពីប្រធានាធិបតីអាមេរិក ថាជាមេដឹកនាំខ្លាំង ដែលឱ្យតម្លៃលើជីវិតមនុស្សជាតិ និងលើកតម្កើងសន្តិភាព កំពុងបង្ហាញថា មេដឹកនាំកម្ពុជា កំពុងដើរផ្លូវត្រូវ ក្នុងការអត់ធ្មត់ខិតខំគោរពបទឈប់បាញ់ ដើម្បីសេចក្ដីសុខរបស់ប្រជាជននៃប្រទេសទាំងពីរ ។
លោក រស់ សារ៉ុម ប្រធានគណបក្សសន្តិភាពជាតិ និងជាប្រធានប្រតិភូឧត្ដមក្រុមប្រឹក្សាពិគ្រោះ និងផ្ដល់យោបល់ ឋានៈស្មើទេសរដ្ឋមន្រ្តី បានបញ្ជាក់ប្រាប់ “នគរធំ” នៅថ្ងៃទី២៨ ខែសីហា ឆ្នាំ២០២៥ ថា ការលើកឡើងរបស់លោកដូណាល់ ត្រាំ ពិតជាត្រឹមត្រូវ ជាសច្ចភាពមួយ ដែលពិភពលោក ប្រជាជនកម្ពុជា ទាំងមូល ទទួលស្គាល់ថា កម្ពុជា តូចតែខ្លាំង កម្ពុជា មានមេដឹកនាំវ័យក្មេង តែខ្លាំង មានមេដឹកនាំដែលមានចក្ខុវិស័យច្បាស់លាស់ មានសមត្ថភាពពិត ដែលអាចដឹកនាំប្រទេស ឆ្ពោះទៅរកការអភិវឌ្ឍមួយយ៉ាងពិតប្រាកដ ហើយអាចការពារខ្លួនឯងគ្រប់ដំណាក់កាល ។
លោក រស់ សារ៉ុម បានមានប្រសាសន៍ថា “វាជាសច្ចភាពពិតប្រាកដមួយ ដែលលោកដូណាល់ ត្រាំ ប្រធានាធិបតីសហរដ្ឋអាមេរិក ជាមហាអំណាចទី១ លើលោក សរសើរនាយករដ្ឋមន្រ្តីកម្ពុជា ថាខ្លាំង ឲ្យតម្លៃជីវិតមនុស្ស និងសន្តិភាពនេះ គឺជារឿងពិតមួយ ដែលមិនអាចប្រកែកបាន ហើយជារឿងពិតមួយបានកើតឡើងនៅក្នុងសង្គមកម្ពុជា ហើយយើងគ្រប់គ្នាចាប់ផ្ដើមឲ្យតម្លៃទៅលើសន្តិភាពទាំងអស់គ្នា ។ នៅពេលដែលយើងមានសង្រ្គាម ៥ថ្ងៃ ជាមួយសៀម យើងចាប់ផ្ដើមស្រលាញ់សន្តិភាពទាំងអស់គ្នា ។ អ៊ីចឹងហើយបានជាក្រោយបទឈប់បាញ់ ទោះបីជាមានការប្រមាថពីសំណាក់សៀម ប៉ុនណាក៏ដោយ គឺនាយករដ្ឋមន្រ្តីរបស់យើង សម្ដេចបវរធិបតី សម្ដេចតេជោ ដែលជាអតីតនាយករដ្ឋមន្រ្តី គឺយុទ្ធសាស្រ្តនៅក្នុងការដឹកនាំប្រឈមជាមួយនឹងវិបត្តិនេះ គឺខ្លាំងណាស់ ដោយលោកទាំងពីរ បានមើលឃើញអំពីតម្លៃនៃការកសាងសន្តិភាព ការស្រលាញ់ជីវិតមនុស្ស ជាងសង្រ្គាម តែភាគីថៃ គឺរកវិធីធ្វើយ៉ាងម៉េចដើម្បីបញ្ឆេះសង្រ្គាម ។ នេះជាអ្វីមួយដែលលោកដូណាល់ ត្រាំ គាត់មើលឃើញជាការត្រឹមត្រូវថា ថៃ មានចេតនារំលោភនូវបទឈប់បាញ់ ។ អ៊ីចឹងកម្ពុជា គោរពបានយ៉ាងល្អ ទោះបីជាមានការប្រមាថខ្លះ ប៉ុន្តែយន្តការនៃការដោះស្រាយវិបត្តិសម្រាប់កម្ពុជា-ថៃ នេះ គឺត្រូវធ្វើឡើងតាមការទូត ធ្វើឡើងតាមផ្លូវច្បាប់អន្តរជាតិ មិនមែនធ្វើតាមចុងកាណុងទេ ។ អ៊ីចឹងយុទ្ធសាស្រ្តដឹកនាំរបស់សម្ដេចបវរធិបតី ពិតជាខ្លាំងពិតប្រាកដ ។ អ៊ីចឹងការលើកឡើងរបស់លោកដូណាល់ ត្រាំ នេះ ពិតជាត្រឹមត្រូវ ជាសច្ចភាពមួយ ដែលពិភពលោក ប្រជាជនកម្ពុជា ទាំងមូល ទទួលស្គាល់ថា កម្ពុជា តូចតែខ្លាំង កម្ពុជា មានមេដឹកនាំវ័យក្មេង តែខ្លាំង មានមេដឹកនាំដែលមានចក្ខុវិស័យច្បាស់លាស់ មានសមត្ថភាពពិត ដែលអាចដឹកនាំប្រទេស ឆ្ពោះទៅរកការអភិវឌ្ឍមួយយ៉ាងពិតប្រាកដ ហើយអាចការពារខ្លួនឯងគ្រប់ដំណាក់កាល“ ។
ដោយឡែក អ្នកវិភាគនិងអ្នកឃ្លាំមើល បានចាប់អារម្មណ៍លើពាក្យ “វិបុលភាព” ដែលលោកដូណាល់ ត្រាំ បានរំលេចនៅក្នុងលិខិតនោះ ដែលមានន័យថា នេះជាឱកាសដែលអាមេរិក ផ្ដល់ភ្លើងខៀវមកកម្ពុជា ហើយកម្ពុជា ក៏ត្រូវចាប់ឱកាសនេះឲ្យជាប់ ក្នុងការពង្រឹងនិងពង្រីកសមត្ថភាពរបស់ខ្លួនបន្ថែមទៀត ។
លោក វ៉ន ចាន់ឡូត អ្នកសិក្សាផ្នែកច្បាប់ និងជាអ្នកវិភាគនយោបាយ-សង្គម បានសរសេរនៅក្នុងគណនីបណ្ដាញសង្គម ហ្វេសប៊ុក របស់លោក នៅថ្ងៃទី២៨ ខែសីហា ឆ្នាំ២០២៥ថា “ វិបុលភាព (prosperity) មានន័យថា ភាពមានបាន ភាពរីកចម្រើនរុងរឿង ដែលសម្បូរទៅដោយទ្រព្យច្រើនក្រៃលែង។ ក្នុងលិខិតរបស់លោកត្រាំ ដែលផ្ញើមកកាន់លោក ហ៊ុន ម៉ាណែត បញ្ជាក់ឃ្លាចុងក្រោយពាក់ព័ន្ធនឹងពាក្យវិបុលភាព។ Now we can focus on prosperity for our two great countries. ឥឡូវយើងអាចផ្ដោតលើវិបុលភាពនៃប្រទេសដ៏អស្ចារ្យរបស់យើងទាំងពីរ។ នេះជាឱកាសដែលអាមេរិក ផ្ដល់ភ្លើងខៀវមកកម្ពុជា“ ។
បន្ថែមលើសំណេរតាមបណ្ដាញសង្គម ខាងលើនេះ លោក វ៉ន ចាន់ឡូត បានបញ្ជាក់ប្រាប់ “នគរធំ” នៅថ្ងៃទី២៨ ខែសីហា ឆ្នាំ២០២៥ ថា នេះជាឱកាសដ៏ល្អនិងដ៏កម្រ ដែលលោកដូណាល់ ត្រាំ បានផ្ញើលិខិតជាផ្លូវការ មកកាន់មេដឹកនាំកម្ពុជា ដើម្បីសម្ដែងនូវសេចក្ដីថ្លែងអំណរគុណ ក៏ដូចជាការបង្ហាញពីសុច្ឆន្ទៈនៅក្នុងការបើកទំព័រនៃកិច្ចសហប្រតិបត្តិការនៃប្រទេសទាំងពីរ ដើម្បីឆ្ពោះទៅរកការអភិវឌ្ឍន៍ ហើយនិងសុខសន្តិភាពជាមួយគ្នា ។ ដូច្នេះកម្ពុជាគួរតែឆក់ឱកាសនេះ ដើម្បីពង្រឹងនិងពង្រីកកិច្ចសហប្រតិបត្តិការជាមួយសហរដ្ឋអាមេរិក ប្រកបដោយភាពស្មោះត្រង់ ការជឿទុកចិត្ត និងតម្លាភាព ជាពិសេសគឺពង្រឹងនៅក្នុងវិស័យការពារជាតិ ដោយអាចបើកឲ្យមាននូវសមយុទ្ធក្នុងទ្រង់ទ្រាយណាមួយសមរម្យ ជាពិសេសគឺការធ្វើទំនើបកម្មសព្វាវុធសម្រាប់បំពាក់លើកងទ័ពកម្ពុជា ទាំងជើងទឹក ជើងគោក និងជើងអាកាស ។
លោក វ៉ន ចាន់ឡូត បានមានប្រសាសន៍ថា “នេះជាឱកាសដ៏ល្អនិងដ៏កម្រ ដែលលោកដូណាល់ ត្រាំ បានផ្ញើលិខិតជាផ្លូវការ មកកាន់មេដឹកនាំកម្ពុជា ដើម្បីសម្ដែងនូវសេចក្ដីថ្លែងអំណរគុណ ក៏ដូចជាការបង្ហាញពីសុច្ឆន្ទៈនៅក្នុងការបើកទំព័រនៃកិច្ចសហប្រតិបត្តិការនៃប្រទេសទាំងពីរ ដើម្បីឆ្ពោះទៅរកការអភិវឌ្ឍន៍ ហើយនិងសុខសន្តិភាពជាមួយគ្នា ។ ដូចយើងដឹង ក្នុងកាលៈទេសៈដែលកម្ពុជា ទទួលរងការឈ្លានពានពីសំណាក់យោធាថៃ ក្នុងនោះសហរដ្ឋអាមេរិក បានដើរតួនាទីមួយដ៏ចាំបាច់និងប្រកបដោយប្រសិទ្ធភាពខ្ពស់ ក្នុងការជំរុញឲ្យមានបទឈប់បាញ់មួយភ្លាមៗ ។ នេះទំនងជាសហរដ្ឋអាមេរិក បានគោរពនូវតួនាទីក្នុងនាមជាមហាអំណាច និងក្នុងនាមជាប្រទេសហត្ថលេខីនៃកិច្ចព្រមព្រៀងសន្តិភាពទីក្រុងប៉ារីស ដែលធានាទៅលើអធិបតេយ្យ បូរណភាពទឹកដីកម្ពុជា និងធានាថា កម្ពុជា នឹងមិនត្រូវទទួលរងការឈ្លានពានណាមួយពីបរទេស ។ បន្ថែមលើនេះ ទំនងលោកដូណាល់ ត្រាំ ក៏ចាប់អារម្មណ៍ខ្លាំងទៅនឹងប្រទេសកម្ពុជា ដែលអាចខុសពីពេលណាទាំងអស់ ដោយក្នុងនោះ ដូណាល់ ត្រាំ មើលឃើញអំពីសប្បុរសធម៌មួយរបស់កម្ពុជា នៅក្នុងការជួយឲ្យកប៉ាល់ដឹកទេសចររបស់សហរដ្ឋអាមេរិក ចូលចតនៅកំពង់ផែសមុទ្រកម្ពុជា ក្នុងពេលដែលប្រទេសនានាក្នុងតំបន់ បដិសេធ ហើយដែលជាពេលវេលានៃការរាតត្បាតកូវីដ-១៩“ ។
លោក វ៉ន ចាន់ឡូត បានមានប្រសាសន៍បន្តថា “ទី២ ទំនងសហរដ្ឋអាមេរិក មើលឃើញអំពីទំនាក់ទំនងនៃអតីតកាល ដែលសហរដ្ឋអាមេរិក ធ្លាប់ជួយកម្ពុជា លើគ្រប់វិស័យ ។ ត្រង់ករណីនេះ តាមរយៈស្ថានទូតសហរដ្ឋអាមេរិក ប្រចាំនៅកម្ពុជា ក៏បានបញ្ជាក់អំពីចេតនានៅក្នុងការរៀបចំកម្មវិធីទំនាក់ទំនងរវាងសហរដ្ឋអាមេរិក និងកម្ពុជា នៅលើទឹកដីនៃខេត្តព្រះសីហនុ ។ ដូចយើងដឹងទឹកដីនៃខេត្តព្រះសីហនុ គឺជាទីតាំងប្រវត្តិសាស្រ្តមួយ ដែលសហរដ្ឋអាមេរិក ធ្លាប់បានជួយមកកាន់មេដឹកនាំកម្ពុជា ហើយក្នុងនោះ គឺមានផ្លូវជាតិលេខ៤ ដែលជាប្រវត្តិសាស្រ្តបន្សល់មកដល់បច្ចុប្បន្ន ។ ដូច្នេះកម្ពុជា គួរតែឆក់ឱកាសនេះ ដើម្បីពង្រឹងនិងពង្រីកកិច្ចសហប្រតិបត្តិការជាមួយសហរដ្ឋអាមេរិក ប្រកបដោយភាពស្មោះត្រង់ ការជឿទុកចិត្ត ហើយនិងតម្លាភាព ជាពិសេសគឺពង្រឹងនៅក្នុងវិស័យការពារជាតិ ដោយអាចបើកឲ្យមាននូវសមយុទ្ធក្នុងទ្រង់ទ្រាយណាមួយសមរម្យ ជាពិសេសគឺការធ្វើទំនើបកម្មសព្វាវុធសម្រាប់បំពាក់លើកងទ័ពកម្ពុជា ទាំងជើងទឹក ជើងគោក និងជើងអាកាស“ ៕ កុលបុត្រ