កាលពីថ្ងៃប្រហស្បតិ៍ ទី៣០ ខែសីហា ឆ្នាំ២០១៨ រដ្ឋមន្ត្រីក្រសួងការបរទេសរុស្ស៊ី បានថ្លែងឱ្យដឹងថា សហរដ្ឋអាមេរិក និងសម្ព័ន្ធមិត្តរបស់ខ្លួន បានត្រៀមមីស៊ីល និងកាំភ្លើងយន្តជាច្រើន ដើម្បីវាយប្រហារទៅលើប្រទេសស៊ីរី ក្នុងរយៈពេល៤ម៉ោង។
នេះបើយោងតាមព័ត៌មានរុស្ស៊ី RT ចេញផ្សាយកាលពីល្ងាចថ្ងៃព្រហស្បតិ៍ ទី៣០ ខែសីហា ឆ្នាំ២០១៨។
លោក Maria Zakharova អ្នកនាំពាក្យក្រសួងការបរទេសរុស្ស៊ី បានថ្លែងថា ក្រុមវាយប្រហារចម្រុះដែលមានរថយន្តផ្ទុកដោយកាំភ្លើងយន្តគ្រប់ធុន ប្រហែល៧០គ្រឿង ត្រូវបានយកមកដាក់ពង្រាយនៅតំបន់មជ្ឈិមបូព៌ា ដែលក្នុងនោះ មានទាំងគ្រាប់មីស៊ីលចំនួន៣៨០ និងមីស៊ីលបាញ់ចេញពីនាវា Tomahawk ចំនួន២៨គ្រឿងផងដែរ។
ទាក់ទងទៅនឹងការចោទប្រកាន់របស់រដ្ឋមន្ត្រីក្រសួងការបរទេសរុស្ស៊ី មន្ទីរបញ្ចោកាណ បានបដិសេធទៅនឹងការលើកឡើងរបស់ទីក្រុងមូស្គូ ដោយនិយាយថា ទីក្រុងវ៉ាស៊ីងតោន គ្រាន់តែកំពុងកសាងកម្លាំងយោធានៅក្នុងតំបន់នោះ ដែលមាននាវាចម្បាំងសហរដ្ឋអាមេរិក ប្រភេទ USS ផងដែរ។
ប្រទេសស៊ីរី កំពុងតែមានភាពតានតឹងខ្លាំងនៅក្នុងខេត្ត Idlib ដែលតាមប្រភពព័ត៌មានខ្លះថា អាចនឹងមានការវាយប្រហារដោយប្រើប្រាស់អាវុធគីមី។
រុស្ស៊ី និងអាមេរិក តែងតែមានគំនិតផ្ទុយគ្នាទៅលើបញ្ហាប្រទេសស៊ីរី ដោយសារតែរុស្ស៊ី គឺជាអ្នកគាំទ្ររបបលោកអាសាដ ខណៈដែលសហរដ្ឋអាមេរិក គាំទ្រពួកឧទ្ទាមប្រឆាំងទៅនឹងរបបលោកអាសាដ៕
