បាត់ដំបង ៖ កាលពីថ្ងៃទី១៤ ខែតុលា ឆ្នាំ២០១៨ សមត្ថកិច្ចខេត្តបាត់ដំបង បានចាប់ឃាត់ខ្លួនបុរសម្នាក់ ដោយបានបរិហារកេរ្តិ៍លោកស្នងការនគរបាលខេត្ត តាមរយៈគណនីហ្វេសប៊ុកមួយ។
ជនសង្ស័យមានឈ្មោះសុខ ធារៈ ហៅណុល កញ្ញា ឬ បញ្ញា ភេទប្រុស អាយុ២៥ឆ្នាំ មានទីលំនៅភូមិឫស្សី២ ឃុំមោង ស្រុកមោងឫស្សី ខេត្តបាត់ដំបង។
តាមប្រភពបានឲ្យដឹងថា កាលពីល្ងាចថ្ងៃទី១០ ខែតុលា ឆ្នាំ២០១៨ គណនីហ្វេសប៊ុកមួយ ឈ្មោះ “តាមប្រហារពួកអានៅបួនជួរនិងអាចិន្តាលុះក្ស័យ” បានបង្ហោះខ្លឹមសារដោយភ្ជាប់រូបភាពចោទប្រកាន់ចំពោះថ្នាក់ដឹកនាំស្នងការនៃស្នងការដ្ឋាននគរបាលខេត្តបាត់ដំបង គឺឧត្តមសេនីយ៍ទោ អ៊ុច សុខុន ដែលខ្លឹមសារទាំងនេះ គឺជារឿងមិនពិត ហើយបានបង្កឲ្យមានការប៉ះពាល់យ៉ាងធ្ងន់ធ្ងរដល់កិត្តិយស និងសេចក្តីថ្លៃថ្នូររបស់ថ្នាក់ដឹកនាំស្នងការដ្ឋាន ក៏ដូចជាកងកម្លាំងនគរបាលជាតិទាំងមូល។
ក្រោយពីឧត្តមសេនីយ៍ទោ អ៊ុច សុខុន បានឃើញ ក៏បានចាត់វិធានការបញ្ជាដល់កម្លាំងទាំងអស់ ឲ្យស្រាវជ្រាវដោយប្រើប្រាស់គ្រប់វិធានការជំនាញ និងដោយមានការសម្របសម្រួលពីព្រះរាជអាជ្ញាអមសាលាដំបូងខេត្តបាត់ដំបង ផងនោះ រហូតដល់ថ្ងៃទី១៤ ខែតុលា ឆ្នាំ២០១៨ បានធ្វើការឃាត់ខ្លួនជនសង្ស័យឈ្មោះ សុខ ធារៈ ហៅណុល កញ្ញា ឬ បញ្ញា មានទីលំនៅភូមិឫស្សី២ ឃុំមោង ស្រុកមោងឫស្សី ខេត្តបាត់ដំបង ។
ជនសង្ស័យបានសារភាពថា “ខ្លួនពិតជាបានបង្កើតគណនីហ្វេសប៊ុកមួយឈ្មោះ (តាមប្រហារពួកអានៅបួនជួរនិងអាចិន្តាលុះក្ស័យ) ហើយយករូបអ្នកផ្សេងដែលខ្លួនមានគំនុំជាមួយ មកដាក់ក្នុងគណនីហ្វេសប៊ុកធ្វើជាម្ចាស់គណនី ហើយបង្ហោះខ្លឹមសារ និងរូបភាពបរិហារកេរ្តិ៍ចំពោះឧត្តសេនីយ៍ទោ អ៊ុច សុខុន ដើម្បីទម្លាក់កំហុសទៅម្ចាស់គណនីហ្វេសប៊ុកនោះតែប៉ុណ្ណោះ ប៉ុន្តែទីបំផុត សកម្មភាពប្រឌិតរឿងដើម្បីទម្លាក់កំហុសទៅអ្នកដទៃនេះ ត្រូវបានសមត្ថកិច្ចនគរបាលបំបែកសំណុំរឿងវែកមុខឃើញហើយ”។
បច្ចុប្បន្ន ជនសង្ស័យ និងភស្តុតាង ត្រូវបានកសាងសំណុំរឿងបញ្ជូនទៅសាលាដំបូងខេត្តបាត់ដំបង ចាត់ការតាមផ្លូវច្បាប់ ៕