កោះកុង៖ កាលពីថ្ងៃទី២១ ខែធ្នូ ឆ្នាំ២០១៨ សមត្ថកិច្ចបានឃាត់ខ្លួនបុរសល្មោភកាមម្នាក់ បន្ទាប់ពីបានទទួលពាក្យបណ្តឹងពីក្មេងស្រីរងគ្រោះម្នាក៉ ដោយនាងបានចោទប្រកាន់ពីបទរំលោភសេពសន្ធវៈ ហេតុការណ៍នេះកើតឡើងនៅភូមិស្ទឹងវែង សង្កាត់ស្ទឹងវែង។
ជនសង្ស័យមានឈ្មោះ មាស អ៊ុយ (ហៅពៅ) ភេទប្រុស អាយុ២៥ឆ្នាំ ជនជាតិខ្មែរ។ ចំណែកក្មេងស្រីរងគ្រោះមានឈ្មោះ គ.ចន ភេទស្រី អាយុ១៤ឆ្នាំ ជនជាតិខ្មែរ មុខរបរនៅផ្ទះ។ អ្នកទាំង២ រស់នៅភូមិឃុំកើតហេតុខាងលើ។
តាមប្រភពបានឲ្យដឹងថា មុនពេលកើតហេតុ ជនសង្ស័យបានលួងលោមក្មេងស្រីរងគ្រោះចាប់រំលោភសេពសន្ធវៈនៅកន្លែងបេះផ្កាកំប្លោក ក្បែរផ្ទះរបស់ក្មេងស្រីរងគ្រោះ ៩លើក រហូតដល់មានផ្ទៃពោះ៦ខែជាង ហើយរឿងនេះបានធ្លាយដឹងឮដល់ឧពុកម្នាយក្មេងស្រី ក៏បាននាំក្មេងស្រីទៅដាក់ពាក្យបណ្តឹងនៅប៉ុស្តិ៍ប៉ូលិស។
បើតាមសមត្ថកិច្ចបានឲ្យដឹងថា បន្ទាប់ពីទទួលបានពាក្យបណ្តឹងពីក្មេងស្រីរងគ្រោះ ឈ្មោះ គ.ចន ថាបានចាប់រំលោភនាងទាល់តែមានផ្ទៃពោះ៦ខែជាង កម្លាំងសមត្ថកិច្ចបានធ្វើការស្រាវជ្រាវឃាត់ខ្លួនជនសង្ស័យម្នាក់ ឈ្មោះមាស អ៊ុយ (ហៅពៅ) មកសាកសួរនៅប៉ុស្តិ៍រដ្ឋបាលនគរបាលស្ទឹងវែង។
នៅចំពោះមុខសមត្ថកិច្ច ជនសង្ស័យបានសារភាពថា ខ្លួនពិតជាបានប្រព្រឹត្តអំពើរំលោភសន្ធវៈទៅលើក្មេងស្រីរងគ្រោះ ឈ្មោះ គចន ពិតប្រាកដមែន។
បច្ចុប្បន្ន កម្លាំងជំនាញ កំពុងកសាងសំណុំរឿង និងបញ្ជូនជនសង្ស័យទៅកាន់តុលាការ ដើម្បីបន្តនីតិវិធីតាមផ្លូវច្បាប់៕