ភ្នំពេញ ៖ បុរសម្នាក់ជាមន្ត្រីអនុរក្សពន្ធនាគារព្រៃស បានសម្រេចចងកធ្វើអត្តឃាត នៅលើផ្ទះខ្លួនឯងខណៈដែលប្រពន្ធចេញទៅផ្សារបាត់ ដែលហេតុការណ៍នេះកើតឡើងកាលពីល្ងាចថ្ងៃទី០៦ ខែមករា ឆ្នាំ២០១៩ នៅចំណុចគ្មានលេខ ផ្លូវលំ ភូមិព្រែកតាគង់១ សង្កាត់ចាក់អង្រែលើ ខណ្ឌមានជ័យ។
មន្ត្រីអនុរក្សពន្ធនាគារព្រៃសដែលធ្វើអត្តឃាតចងកសម្លាប់ខ្លួនឯងនេះ មានឈ្មោះគង់ សំអឿន មានឋានៈវរសេនីយ៍ទោ ស្នាក់នៅភូមិឃុំកើតហេតុខាងលើ។
តាមស្តីជាប្រពន្ធជនរងគ្រោះ ឈ្មោះសាន់ ស្រីវ៉ាន់ បានឲ្យដឹងថា មុនពេលកើតហេតុ គាត់បានចេញទៅទិញផ្លែក្រូច ដោយប្តីរបស់គាត់បាននៅផ្ទះ។ លុះដល់ម៉ោង៥ល្ងាច គាត់បានត្រឡប់មកពីផ្សារទិញផ្លែក្រូចវិញ ស្រាប់តែមិនឃើញប្តីសោះ គាត់ខំដើររកក៏ប្រទះឃើញប្តីបានចងកសម្លាប់ខ្លួនក្នុងបន្ទប់ទឹក ដោយក្រមាការ៉ូពណ៌ចម្រុះចងជាប់ធ្នឹម។
លោកស្រីបានបន្តថា ពេលនោះគាត់ក៏បានស្រែក ធ្វើឲ្យភ្ញាក់ផ្អើលដល់អ្នកជិតខាងមកជួយ ហើយក៏បានរាយការណ៍ប្រាប់សមត្ថកិច្ចឲ្យចុះអន្តរាគមន៍ភ្លាមៗ។
ពេលសមត្ថកិច្ចជំនាញមកដល់ បានពិនិត្យ និងធ្វើកោសល្យវិច័យសាកសព រួចបានបញ្ជាក់ថា ជនរងគ្រោះពិតជាបានចងកសម្លាប់ខ្លួនប្រាកដមែន ពុំមែនរឿងអ្វីផ្សេងនោះទេ តែពុំទាន់ដឹងមូលហេតុប្រាកដនៃការធ្វើអត្តឃាតនៅឡើយទេ ហើយក៏បានប្រគល់សាកសពឲ្យក្រុមគ្រួសារយកទៅធ្វើបុណ្យតាមប្រពៃណី៕
