កែវ ច័ន្ទនិមល មិនបានខឹងសម្បាអ្នករិះគន់ ថែមទាំងបង្ហោះសារថា “ខ្ញុំមានថ្ងៃនេះក៏ដោយសារហង្សមាស និងបងប្អូនទាំងអស់គ្នា ដូច្នេះហើយទើបធ្វើឲ្យខ្ញុំមិនចុះចាញ់”

ក្រោយពេលដែលអ្នកដឹកនាំកម្មវិធី “ឋានសួគ៌ឬឋាននរក” ចេញសារទទួលស្គាល់នូវកំហុសឆ្គង ដែលធ្វើឲ្យអ្នកគាំទ្រធ្វើការរិះគន់ទៅលើអ្នកនាងកែវ ច័ន្ទនិមល យ៉ាងខ្លាំងនោះ ទីបំផុតអ្នកនាងនិមល មិនបានគេចវេះនោះទេ ថែមទាំងចេញសារថា “ខ្ញុំមានថ្ងៃនេះក៏ដោយសារហង្សមាស និងបងប្អូនទាំងអស់គ្នា ដូច្នេះហើយទើបធ្វើឲ្យខ្ញុំមិនចុះចាញ់”។

អ្នកនាងកែវ ច័ន្ទនិមល បានបង្ហោះសារលើទំព័រហ្វេសប៊ុករបស់អ្នកនាងថា “នាងខ្ញុំសូមអរគុណដល់បងប្អូនទស្សនិកជនទាំងអស់ដែលបានយកចិត្តទុកដាក់តាមដាននិងរិះគន់ក្នុងន័យស្ថាបនាគ្រប់យោបល់ អរគុណដល់ក្រុមការងារក្រុមហ៊ុនហង្សមាស ដែលបានបកស្រាយការពិតពីក្រោយខ្នងនៃរឿងទាំងអស់នេះ”។

អ្នកនាងនិមល បានបន្តថា ”ក្នុងនាមនាងខ្ញុំនិងបងProducer ព្រមទាំងបុគ្គលិកទាំងអស់ក្នុងស្ថាបន័ផ្សព្វផ្សាយ និងកំសាន្ត គឺតែងតែព្យាយាមអស់ពីលទ្ធភាពដើម្បីបំរើអារម្មណ៍ទស្សនិកជន ដូច្នេះយើងខ្ញុំពិតជាសោកស្តាយនិងសុំការអធ្យាស្រ័យចំពោះកំហុសឆ្គងដោយអចេតនាមួយនេះ ទោះបីជានាងខ្ញុំត្រូវអានសំណួរ និងឆ្លើយចំលើយទៅតាមអ្វីដែលកម្មវិធីបានរៀបចំឲ្យក៏ពិតមែន ក៏នាងខ្ញុំហ៊ានអះអាងថា បង Producer គ្មានបំណងសាងកំហុសនេះឡើយ”។

អ្នកនាងបាបន្ថែមទៀតថា “ដូច្នេះសូមការយោគយល់ពីបងប្អូនផងចុះ យើងខ្ញុំមិនបានគេចវេសពីកំហុសឡើយ គ្រាន់តែការងារមួយចំនួនយើងត្រូវការជជែកវែកញែកជាមួយក្រុមការងារដើម្បីរកដំណោះស្រាយមួយដ៏ល្អបំផុតសម្រាប់បងប្អូនទាំងអស់គ្នា ព្រោះបងប្អូនខឹងក៏ដោយសារបងប្អូនមិនចង់ឲ្យយើងខ្ញុំខុស ហើយក៏សូមអរគុណសម្រាប់ការលើកទឹកចិត្តរបស់ក្រុមគ្រួសារបងប្អូនមិត្តភក្កិទាំងអស់ក្នុងពេលប៉ុន្មានថ្ងៃនេះមកលើនាងខ្ញុំ ខ្ញុំមានថ្ងៃនេះក៏ដោយសារហង្សមាស និងបងប្អូនទាំងអស់គ្នា ដូច្នេះហើយទើបធ្វើឲ្យខ្ញុំមិនចុះចាញ់”។

យ៉ាងណា កាលពីម្សិលមិញនេះ ក្រោយឃើញភរិយាជាទីស្រលាញ់រងការរិះគន់ស្រោចដូចទឹកភ្លៀងនោះ ស្វាមីរបស់នាងមានឈ្មោះ សូវ៉ាត សីលា បានបង្ហោះសារលើទំព័រហ្វេសប៊ុកថា “ប៉ុន្មានឆ្នាំនេះអូនខិតខំប្រឹងប្រែងយកអស់កម្លាំងកាយចិត្តនិងដោយក្តីស្រលាញ់បំពេញការងារជាពិធីការិនីជាមួយនឹងការទទួលខុសត្រូវខ្ពស់ និងបានសម្រេចនូវលទ្ធផលជាច្រើន ជាពិសេសបើមិនមានគោលការណ៍ អូនក៏មិនដែលហ៊ានសម្រេចចិត្តខ្លួនឯងឡើយហើយអូនក៏ជាមនុស្សស្រីម្នាក់ដែលរឹងមាំនិងបានផ្តល់នូវក្តីស្រលាញ់និងយកចិត្តទុកដាក់ចំពោះអ្នកផងទាំងពួងផងដែរ បងពិតជាមានមោទនភាពចំពោះអូនខ្លាំងណាស់”។

លោកសីលា បានបន្ថែមថា “គ្រានេះដោយសារមានមតិរិះគន់ដោយអសីលធម៌ពីមនុស្សមួយចំនួន (តូច) វាពិតជាធ្វើឲ្យប៉ះពាល់ដល់អារម្មណ៍របស់អូនខ្លាំងណាស់ ដោយវាក៏មិនមែនជាកំហុសរបស់អូនឡើយ ហើយអូនក៏មិនបានតបតសូម្បីតែបន្តិច តែទោះស្ថិតក្នុងកាលៈទេសបែបណាក៏ដោយ បងនិងក្រុមគ្រួសារនៅតែស្រលាញ់ និងមានមោទនភាពចំពោះអូនជានិច្ច។

ឆ្លើយតបនឹងការលើកទឹកចិត្តរបស់ស្វាមី អ្នកនាងកែវ ច័ន្ទនិមល បានបង្ហោះសារតបថា “អរគុណលោកប្តីដែលតែងតែផ្តល់តម្លៃលើការងារអូននៅក្បែរអូន លើកទឹកចិត្តអូនគ្រប់ពេល មិនគិតពីការងារខ្លួនក្នុងពេលដែលអូនត្រូវការជំនួយសូវ៉ាត សីលា សុំទោសដែលធ្វើឲ្យអ្នកផ្ទះយើង រួមទាំងបងបារម្ភ”៕