បន្ទាប់ពីទទួលដំណឹងថា នាយសាន់ម៉ៅ បានទទួលមរណភាពទៅហើយនោះ អ្នកនាងគ្រត ដែលជាដៃគូកំប្លែង និងដៃគូកាត់សក់តាមរោងការផងនោះ បានសម្តែងនូវអារម្មណ៍សោកស្តាយជាខ្លាំង ព្រមទាំងបង្ហោះសារនូវពាក្យពេចន៍មួយចំនួនផងដែរ។
អ្នកនាងគ្រត បានបង្ហោះសារថា “ប្អូនរន្ធត់ចិត្ត តក់ស្លុត ស្តាយស្រណោះនូវការបាត់បង់បងប្រុសដ៏ល្អ ជាដៃគូដ៏កម្រ និងសិល្បករដ៏មានទេពកោសល្យម្នាក់ ប្អូនពិតជាពិបាកនឹងទទួលយកខ្លាំងណាស់ សូមអោយវិញ្ញាណក្ខន្ធបងប្រុសបានទៅកាន់សុគតិភពផងចុះ”។
គួរបញ្ជាក់ផងដែរថា អ្នកនាងគ្រត និងនាយសាន់ម៉ៅ គឺជាកូនក្រុមកំប្លែងរបស់លោកជួង ជី ហៅកុយ និងតែងតែផ្តល់សំណើចដល់មហាជនយ៉ាងច្រើនផងដែរ។
នាយសាន់ម៉ៅ បានធ្លាក់ខ្លួនឈឺធ្ងន់នៅរយៈពេល២ឆ្នាំក្រោយនេះ ដោយស្ថានភាពរបស់លោកត្រុវបានយកចិត្តទុកដាក់ពីសំណាក់ថ្នាក់ដឹកនាំ មិត្តភក្តិសិល្បៈរួមអាជីព។ នៅពេលលោកសម្រាកព្យាបាលជំងឺនៅមន្ទីរពេទ្យកាល់ម៉ែត្រ អ្នកនាងគ្រត ក៏ធ្លាប់បានទៅសួរសុខទុក្ខ និងបានបង្ហូរទឹកភ្នែកជោគផែនថ្ពាល់នៅពេលឃើញស្ថានភាពរបស់ដៃគូដ៏ស័ក្តិសមនេះ។
មកដល់ពេលនេះ សាកសពនាយសាន់ម៉ៅ បានដឹកពីមន្ទីរពេទ្យខេត្តអូប៊ុន ប្រទេសថៃ យកមកតម្កល់នៅក្នុងវត្តព្រែកប្រា ខណ្ឌច្បារអំពៅ ដើម្បីរៀបចំធ្វើបុណ្យតាមប្រពៃណី៕
