ម្ចាស់បទ “រាំញីកែងជើង” ងួន ចាន់ដេវីត ហៅ G-Devith បានឱ្យដឹងថា ខ្លួននិងពេជ្រ សោភា ធ្លាប់ចាប់ដៃគូគ្នាកន្លងមក គឺជាការជួយគ្នាទៅវិញទៅមក គ្មានអ្នកណាជួយអ្នកណាឡើយ។
ដេវីត បញ្ជាក់ថា “កាលហ្នុង គាត់ (សោភា) ប្រៀបដូចជាអ្នកធ្វើនំអីចឹង ហើយខ្ញុំជាអ្នករកទីផ្សារ។ ខ្ញុំគិតថា ពេលយើងចាប់ដៃគូហ្នុង ចំណេញទាំងសងខាងដូចគ្នា គ្មានអ្នកណាជួយ អ្នកណាទេ”។
ការថ្លែងរបស់អតីតតារាហង្សមាស នៅពេលនេះ ក្រោយពីអ្នកជំនាញសិល្បៈបានលើកឡើងថា ងួន ចាន់ដេវីត និងពេជ្រ សោភា ចាប់ដៃគូជាមួយគ្នាកាលពីឆ្នាំ២០១៦ នោះ ពួកគេស័ក្តិសមជាមួយគ្នាបំផុត ពេលច្រៀងសម្តែងរួមគ្នា ហើយទាំងដេវីត និងសោភា ក៏ជោគជ័យខ្លាំងផងដែរ អំឡុងពេលដែលពួកគេនៅត្រូវរ៉ូវគ្នានោះ។
មហាជននិយាយថា បើគ្មានសោភា ទេ ដេវីត ក៏គ្មានឱកាសបានចូល ហង្សមាស ខណៈអ្នកខ្លះថា សោភា ធ្លាប់ធ្លាក់កេរ្តិ៍ឈ្មោះចុះម្តងហើយ បើគ្មានដេវីត ក៏នាងមិនអាចងើបឡើងវិញបានដែរ។
ប៉ុន្តែពេលនេះអ្វីៗនៅសល់តែស្រមោលប៉ុណ្ណោះ ព្រោះតែដេវីត បានចាកចេញពីសោភា ហើយងាក ទៅចាប់ដៃគូជាមួយតារាចម្រៀងដែលសោភា មិនត្រូវគ្នាទាល់តែសោះ គឺទេព បូព្រឹក្ស ហើយដេវីត ក៏បានបើកផលិតកម្មផ្ទាល់ខ្លួន ដោយជ្រើសរើសតារាចម្រៀងឱ្យចូលផលិតកម្មខ្លួនជាបន្តបន្ទាប់ផងដែរ។
ងួន ចាន់ដេវីត បន្ថែមថា “តាំងពីខ្ញុំចេញពីហង្សមាស មក ឥឡូវមានការងារធ្វើច្រើនជាងមុន អ៊ីចឹងប្រាក់ចំណូលក៏កើនឡើងដែរ។ ប៉ុន្តែខ្ញុំមានពេលនេះ ដោយសារតែបានការគាំទ្រកាលនៅហង្សមាស ដែរ។ ចំពោះផលិតកម្មវិញខ្ញុំមានតារាចូលជាសមាជិកចំនួន៧នាក់ហើយ យើងក៏កំពុងសម្លឹងមើលតទៅទៀតដែរ ព្រោះបទចម្រៀងដែលយើងធ្វើចេញតាមយូធូប និង Page គឺមានគ្រប់រសជាតិ ទាំងអស់”។
ងួន ចាន់ដេវីត ថា ចំពោះពិធីបុណ្យអុំទូកខាងមុខនេះ លោកច្រៀងនៅភ្នំពេញ១ថ្ងៃ និងនៅខេត្តសៀមរាប២ថ្ងៃផងដែរ ជាមួយដៃគូកំពូលស្នេហ៍ទេព បូព្រឹក្ស។
ចំពោះរឿងថា តើនាពេលខាងមុខ ដេវីត នៅធ្វើជាថៅកែផលិតកម្មផ្ទាល់ខ្លួនរហូត ឬចូលច្រៀងឱ្យផលិតកម្មណាមួយនោះ ដេវីត ថា លោកនឹងសិក្សាទៅតាមពេលវេលា៕