ពិធីការិនីតូចតន់របស់ទូរទស្សន៍ PNN កញ្ញាពេជ្រ ច័ន្ទធីតា បានធ្វើជាអ្នកកំដរមង្គលការអ្នកនាងកែវ សីហា កាលពីថ្ងៃទី២៧ ខែវិច្ឆិកា ឆ្នាំ២០១៩ ហើយអតីតបេក្ខភាព Cambodian Idol រដូវកាលទី១ តែបរាជ័យកាន់ពាន ព្រោះមិនអាចប្រជែងជាមួយលោកនី រតនា បាននេះ បានបង្ហើបឱ្យដឹងថា ពេលនាងឃើញគេរៀបការ នាងចិត្តចង់តែរៀបការដែរ។ ប៉ុន្តែយ៉ាងណា ស្រីស្រស់រូបនេះថានាងមិនអាចកំណត់ពេលវេលារៀបមង្គលការបាននៅពេលណាឡើយ។
ពេជ្រ ច័ន្ទធីតា វាចាថា “ខ្ញុំចង់រៀបការ តែមិនដឹងថាពេលណាទេ! ចាំមើលពេលវេលាអំណោយផលសិន”។
ការថ្លែងចង់លាភាពក្រមុំរបស់កញ្ញាពេជ្រ ច័ន្ទធីតា នៅពេលនេះ ក្រោយពីស្រីស្អាតបានបង្ហាញមុខគូស្នេហ៍ជាតន្ត្រីករម្នាក់ជាចំហកាលពីពេលថ្មីៗនេះ ប៉ុន្តែនាងថា ដោយសារខ្លាចខូចក្រេឌីត និងមិនចង់ឱ្យគេដឹងថា នាងមានសង្សារទើបអតីតគ្រូបង្រៀនភាសាអង់គ្លេសនៅក្រុងតាខ្មៅរូបនេះ សម្រេចចិត្តលែងហ៊ានបណ្តើរគូស្នេហ៍ជាចំហដូចមុនទៀតហើយ គឺជ្រើសផ្លូវសាងស្នេហ៍ដោយលាក់លៀមវិញ។
អ្វីដែលស្ទើរតែមិនគួរឱ្យជឿនោះ កញ្ញាធីតា ថែមទាំងហ៊ាននិយាយថា នាងមានអារម្មណ៍ស្នេហា ជាមួយសង្សារជាតន្ត្រីករនោះត្រឹមតែ២០ភាគរយប៉ុណ្ណោះ ដែលការវាចាបែបនេះធ្វើឱ្យចំណង ស្នេហានាងប្រឈមនឹងការផុយស្រួយជាមិនខាន បើសិនជាលេចឮដល់លោកតន្ត្រីកររូបនោះ ព្រោះបុរសនោះស្រលាញ់នាងខ្លាំងពេករហូតចង់លេបធីតា ចូលទៅក្នុងពោះដើម្បីកុំឱ្យប្រុសដទៃមើលឃើញទៀតផង ប៉ុន្តែធីតា វិញ បែរជាស្រលាញ់សង្សារមិនបានមួយចំណិតដូចលោកតន្ត្រីករព្យាណូរូបនោះស្រលាញ់នាងពេញបេះដូងឡើយ។
គួរបញ្ជាក់ថា ពេជ្រ ច័ន្ទធីតា បាន បោះបង់អាជីពជាពិធីការិនីនៅទូរទស្សន៍ហង្សមាស មកក្រសោបតំណែងនៅទូរទស្សន៍ PNN ហើយពេលនេះនាងត្រូវបានអ្នកគ្រប់គ្រងកម្មវិធី “ពេញចិត្ត” បានផ្តល់កម្មវិធីធំៗឱ្យនាងធ្វើពិធីការិនី ទើបធ្វើឱ្យនាងលេចធ្លោគួរសម។
ដោយឡែក អាជីពចម្រៀងវិញ កញ្ញាធីតា អះអាងថា រកបានទ្រនំជ្រកហើយនិងត្រៀមចេញបទចម្រៀងថ្មីៗនាពេលខាងមុខនេះទៀតផង បន្ទាប់ពីគ្មានឱកាសឈរជើងនៅផលិតកម្មរស្មីហង្សមាស, សាន់ដេ និងថោន។
ក្រៅពីពេជ្រ ច័ន្ទធីតា តារាចម្រៀងដែលធ្លាប់ប៉ះស្នេហ៍តន្ត្រីករ មានដូចជា ឱក សុគន្ធកញ្ញា, មាស សុខសោភា, សុខ សីឡាលីន, សុខ ស្រីលក្ខណ៍, សុខ ច័ន្ទធីតា និងពេជ្រ សិរីរ័ត្ន ជាដើម៕
