ខេត្តស្វាយរៀង ៖ ស្ត្រីមានផ្ទៃពោះម្នាក់ សម្រាលបានកូនភ្លោះ ដល់ទៅ៣នាក់ នៅមន្ទីរពេទ្យបង្អែកខេត្ត ស្វាយរៀង ដោយទាំងម្តាយនិងទារក សុទ្ធតែមានសុខភាពរឹងមាំល្អ និងកំពុងទទួលបានការមើលថែទាំយ៉ាងយកចិត្តទុកដាក់ ពីក្រុមគ្រូពេទ្យជំនាញ។
ស្ត្រីដែលសម្រាលបានកូនភ្លោះ៣នាក់ មានឈ្មោះសូត្រ គន្ធា មានប្តីឈ្មោះទេស ភានិត្យ និងមានលំនៅក្នុងភូមិចេក សង្កាត់ចេក ក្រុងស្វាយរៀង។
យោងតាមប្រភពមន្ទីរពេទ្យបង្អែកខេត្តស្វាយរៀង បានឱ្យដឹងថា ស្ត្រីម្នាក់ រស់ក្នុងភូមិចេក សង្កាត់ចេក ក្រុងស្វាយរៀង សម្រាលបានកូនភ្លោះ ៣នាក់ កាលពីរសៀលថ្ងៃទី១៨ ខែកក្កដាឆ្នាំ២០២៥។
ប្រភពដដែល បន្តថា ស្ត្រីដែលសម្រាលបានកូនភ្លោះ ៣នាក់ មានស្វាមីឈ្មោះទេស ភានិត្យ និងរស់នៅភូមិចេក សង្កាត់ចេក ក្រុងស្វាយរៀង ខេត្តស្វាយរៀង។ ចំណែកកូនភ្លោះទាំង៣នាក់ រួមមាន ទី១-ឈ្មោះរិ នាដសយ ភេទស្រី ទម្ងន់២,៦គីឡូក្រាម (សម្រាលនៅវេលាម៉ោង៣និង១៥នាទីរសៀល)។ ទី២-ឈ្មោះរិ នាដសា ភេទស្រី ទម្ងន់២,៤គីឡូក្រាម (សម្រាលនៅវេលាម៉ោង ៣និង២០នាទីរសៀល) និងទី៣-ឈ្មោះរិ នាដនិស្ស័យ ភេទស្រី ទម្ងន់ ២,២ គីឡូក្រាម (សម្រាលនៅវេលាម៉ោង៤និង១០នាទីរសៀល)។
សូមបញ្ជាក់ថា នៅវេលាល្ងាចថ្ងៃដដែល លោកស្រី ឃួន សោភ័ណ្ឌ ចៅសង្កាត់ចេក បានអញ្ជើញសួរសុខទុក្ខគ្រូសារលោក ទេស ភានិត្យ និងលោកស្រី សូត្រ គន្ធា ព្រមទាំងជូនពរម្តាយ និងកូនៗមានសុខភាពល្អ៕