ខេត្តសៀមរាប ៖ បន្ទាប់ពីបើកដំណើរការជាផ្លូវការ កាលពីឆ្នាំ២០២២ មក សួនរុក្ខជាតិអង្គរ (Angkor Botanical Garden) ត្រូវបានអាជ្ញាធរអប្សរា ខិតខំយកចិត្តទុកដាក់ក្នុងការថែទាំ អភិវឌ្ឍន៍ និងបង្កើនភាពទាក់ទាញជាបន្តបន្ទាប់ ហើយបានប្រែក្លាយជាគោលដៅទេសចរណ៍ និងពេញនិយមសម្រាប់ការទស្សនា ក្រៅពីប្រាង្គប្រាសាទនានា។
លោកមាឃ បូរ៉ា មន្ត្រីគ្រប់គ្រងសួនរុក្ខជាតិអង្គរ បានឱ្យដឹងថា ក្នុងទំហំផ្ទៃដីប្រមាណ ១៥ហិកតារ សួនរុក្ខជាតិអង្គរ ត្រូវបានបែងចែកជា ៥ផ្នែក ខុសៗគ្នា រួមមាន ៖ សួនឱសថ សួនផ្កា សួនអម្បូរត្នោត សួនលំនៅឋានខ្មែរ និងសត្វព្រៃ ជាដើម។ មកដល់ពេលនេះ អាជ្ញាធរជាតិអប្សរា បានយកចិត្តទុកដាក់ក្នុងការថែទាំនិងរៀបចំរហូតមានការវិវត្តរីកចម្រើនថ្មីៗ ដូចជា សួនផ្កាកុលាប និងសួនកេសរកូល ក៏បានបង្កើតបន្ថែម រហូតមានភាពទាក់ ទាញទេសចរជាតិ និងអន្តរជាតិ បានចូលមកទស្សនាជាហូរហែ។ ចាប់តាំងពីបើកដំណើរការមក ទេសចរជាតិ និងអន្តរជាតិ ចំនួនប្រមាណ ៦០ម៉ឺននាក់ហើយ បានចូលមកទស្សនានៅទីនេះ ដោយឥតបង់ថ្លៃ។
លោកមាឃ បូរ៉ា បន្តថា សួនរុក្ខជាតិអង្គរ គឺជាមជ្ឈមណ្ឌលមួយ ដែលប្រមូលផ្តុំទៅដោយរុក្ខជាតិកម្រៗ ជិតផុតពូជជាច្រើនប្រភេទ ដោយរុក្ខជាតិខ្លះ ភ្ញៀវទេសចរមិនទាន់បានស្គាល់នៅឡើយ។ ហេតុដូច្នេះ ទេសចរ មិនត្រឹម តែទស្សនាដើម្បីទទួលបានអារម្មណ៍ថ្មីប្លែកជាមួយ ទេសភាពបៃតង និងទស្សនាសត្វកម្រៗប៉ុណ្ណោះទេ ប៉ុន្តែសួនរុក្ខជាតិអង្គរ ជាទីតាំងសិក្សាស្រាវជ្រាវបន្ថែមសម្រាប់សិស្សានុសិស្សថែមទៀតផង។
សួនរុក្ខជាតិអង្គរ មានទំហំធំលាតសន្ធឹងរហូតដល់ ១៥ហិកតារ ដូច្នេះការថែទាំសួន ត្រូវការកម្លាំងពលកម្មច្រើនសម ដោយបែងចែកការថែទាំទៅតាមលក្ខណៈបច្ចេកទេសរៀងៗខ្លួន។
មន្ត្រីគ្រប់គ្រងសួនរុក្ខជាតិអង្គរ បានបន្ថែមថា តាមរយៈចក្ខុវិស័យវែងឆ្ងាយ របស់ថ្នាក់ដឹកនាំអាជ្ញាធរជាតិអប្សរា នឹងបន្តអភិវឌ្ឍន៍សួនរុក្ខជាតិអង្គរ ឱ្យក្លាយជាសួនកម្រិតស្តងដារអន្តរជាតិ ដូចសួនដទៃទៀតនៅលើពិភពលោក។
សូមជម្រាបថា សួនរុក្ខជាតិអង្គរ មានទីតាំងនៅតាមបណ្តោយរុក្ខវិថីព្រះសីហនុ ជិតបុរីប្រិមប្រិយ។ សួនរុក្ខជាតិអង្គរ បើកឱ្យទេសចរជាតិនិងអន្តរជាតិ ចូលទស្សនាដោយឥតគិតថ្លៃ ចាប់ពីម៉ោង៨ព្រឹក រហូតដល់ម៉ោង៦ល្ងាច ចាប់ពីថ្ងៃពុធ រហូតដល់ថ្ងៃចន្ទ និងថ្ងៃបុណ្យជាតិ លើកលែងថ្ងៃអង្គារ៕
