តាមប្រភពព័ត៌មានពីគេហទំព័របរទេស ចេញផ្សាយកាលពីថ្ងៃចន្ទ ទី១៧ ខែកញ្ញា ឆ្នាំ២០១៨ បានឱ្យដឹងថា លោក Maurizio Sarri គ្រូបង្វឹកក្លឹបតោខៀវ Chelsea បាននិយាយថា ខ្សែប្រយុទ្ធ Eden Hazard អាចឈ្នះពានរង្វាន់ស្បែកជើងមាស រដូវកាលនេះ។
កីឡាករខ្សែប្រយុទ្ធប៊ែលហ្ស៊ិក រកគ្រាប់បាល់បាន៣គ្រាប់ កាលពីរាត្រីថ្ងៃសៅរ៍កន្លងទៅ ក្នុងការប្រកួតឈ្នះ Cardiff ៤-១។
គិតមកទល់ពេលនេះ Hazard កំពុងតែនាំមុខគេ ក្នុងការរកគ្រាប់បាល់បញ្ចូលទីបាន៥គ្រាប់។
ឆ្លើយតបទៅនឹងអ្នកកាសែត ដែលបានសួរក្រោយដឹកនាំឈ្នះក្លឹប Cardiff តើ Hazard អាចឈ្នះស្បែកជើងមាស?
លោក Sarri បានឆ្លើយថា “ខ្ញុំគិតថា គាត់អាចមានឱកាសធ្វើបាន”។
លោកបានបន្តទៀតថា “ខ្ញុំបាននិយាយជាមួយ Hazard រួចហើយថា គាត់អាចរកគ្រាប់បាល់បាន៤០គ្រាប់ មានឱកាសស្វែងរកជើងមាស សម្រាប់រដូវកាលនេះ”។
ជាងនេះទៅទៀត លោក Sarri បានឱ្យដឹងទៀតថា “ប្រសិនបើគាត់នៅតែរក្សាទម្រង់ លេងបានល្អដូចនេះ ប្រាកដណាស់នឹងបានពាក់ស្បែកជើងមាស”៕
